Ўзбекистонда бизнес соҳаси вакиллари келгуси 12 ойда нархлар ўсиши 15,2 фоиз бўлишини кутмоқда

Марказий банк июнь ойи учун тадбиркорлик субъектларнинг инфляцион кутилмалари шарҳини тақдим қилди (пдф).

Инфляцион кутилмалар — турли гуруҳлар бўйича мос жавобни белгилаган аҳоли сонининг ўша жавоблар ўртача қийматига кўпайтмалари йиғиндисини жами аҳоли сонига нисбати (ўртача кўрсаткич).

Инфляцион кутилмаларнинг медиана қиймати – келгусидаги инфляция бўйича жавоблар вариацион қаторини тенг иккига бўлувчи қиймат

Жорий йилнинг июль ойида ўтказилган сўровларга кўра, бизнес соҳаси вакилларининг келгуси 12 ой учун нархлар ўсиши бўйича инфляцион кутилмалари кетма-кет 2 ой пасайиб, 15,2 фоизни ташкил этган бўлса, медиана қиймати 13,4 фоизга тенг бўлди.

Июль ойида тадбиркорларнинг кўпчилиги келгуси 12 ойда инфляцияни 9-12 фоиз атрофида бўлишини кутмоқда.

Тадбиркорларнинг фикрича, кейинги 12 ойда нархлар ошишига қуйидаги омиллар бевосита таъсир кўрсатади:

• валюта курсининг ўзгариши — 34 фоиз; 
• ёқилғи ва энергоресурслар нархининг қимматлашиши — 31 фоиз; 
• импорт қилинадиган хом ашё ва бутловчи қисмлар нархининг ошиши — 28 фоиз 

Транспорт хизмати харажатларининг ошиши, импорт қилишдаги тариф ва нотариф чекловларнинг мавжудлиги ва хориждан хом ашё етказиб беришда узилишлар бўлишини кутаётган тадбиркорларнинг улуши ўтган ойга нисбатан ошган.

Бунда бизнес вакилларининг юқоридаги омиллар бўйича хавотирларининг кучайиши ўтган ойда бензин ва дизель нархлари қимматлашгани билан изоҳланмоқда.

Шунингдек, коммунал хизматлар қимматлашиши ҳамда иш ҳақи ва нафақаларнинг ошишининг келгуси даврда нархларга таъсирини кутаётганлар ҳиссаси ўтган ойга нисбатан қисқарган.