АҚШ Конгресси Вакиллар палатаси спикери Нэнси Пелосининг қисман тан олинган Тайванга шов-шувли ташрифидан кейин, унинг Осиё сафари доирасида Жанубий Кореяга келиши умид қилинганидек даражада эътиборга лойиқ бўлмади, деб ёзади «РБК».
4 август куни эрталаб Associated Press Пелосининг Шимолий ва Жанубий Корея ўртасидаги қуролсизлантирилган ҳудудга ташриф буюриш режаси ҳақида хабар берди. У 1953 йилда Корея урушига нуқта қўйган ўт очишни тўхтатиш ҳақидаги битим имзоланган Пханмунжом қишлоғига бориши керак эди. Аммо ОАВларда сиёсатчининг Пханмунжомдаги суратлари ҳам, унинг америкалик ҳарбийлар қаршисида сўзлаган нутқидан иқтибослар ҳам пайдо бўлмади.
Ўз Twitter-аккаунтига Осиё сафарининг бориши ҳақида мунтазам постлар қўйиб бораётган Пелосининг ўзи ҳам бу воқеаларни четлаб ўтди. Бу АҚШ Вакиллар палатаси спикерининг 20 йил ичида Жанубий Кореяга биринчи ташрифи экани ҳам эътибордан четда қолди. Америка президенти Жо Байден эса Сеулга 2022 йил майида келган эди.
Ташрифнинг энг кўп муҳокама қилинган воқеаси Пелосининг Жанубий Корея президенти Юн Сок Ёль томонидан қабул қилинмагани бўлди. У АҚШ Вакиллар палатаси спикери билан унинг Осиё сафари доирасида юзма-юз учрашишдан бош тортган биринчи етакчидир. Бунгача уни Сингапур бош вазири Ли Сяньлун, Малайзия бош вазири Исмаил Сабри Яакоб ва Тайвань президенти Цай Инвэнь қабул қилган эди.
Пелоси Жанубий Корея раҳбари билан учрашмаганлигининг расмий сабаби сифатида графикларнинг мос келмаганлиги айтилди — унинг ташрифи белгиланган санага президентнинг таътили тўғри келиб қолди.
Аммо Юн Сок Ёль Пелоси ташриф буюрган куни Сеулда бўлган ва у билан учрашиш имкониятига эга бўлган, аммо 40 дақиқалик телефон суҳбати билан чекланишга қарор қилган. Маҳаллий ОАВлар ёзишича, жанубий кореялик юқори мансабли амалдорлардан ҳеч бири Пелосини учиб келган вақтда қарши олмаган, аммо аэропортга фахрий қоровул жўнатилган. Махсус борт трапи ёнида уни АҚШнинг Жанубий Кореядаги элчиси Филип Голдберг ва АҚШнинг мамлакатдаги қуролли кучлари қўмондони Пол Лакамера кутиб олган.
The Chosun Ilbo манбаларига таяниб ёзишича, ушбу вазиятни Америка томони протоколларга риоя қилмаслик деб баҳолади, элчихонада ҳам норозиликка сабаб бўлган. Таъкидланишича, Пелоси келиб қўнган пайтда мамлакат президенти спектакль томоша қилаётган бўлган. Натижада Пелоси фақат республика Миллий мажлиси спикери Ким Жин-Пё билан музокаралар ўтказган. Жанубий Корея ташқи ишлар вазири Юн Бёнсе бу вақтда Камбоджада АСEAН раҳбарлари учрашувида бўлган.
Asia Times маълумотларига кўра, Пелосининг бундай совуқ кутиб олинишига Жанубий Корея унинг Хитой тарафидан танқидга учраган Тайванга ташрифидан кейинги биринчи бекат бўлгани сабаб бўлган бўлиши мумкин. Мутахассислар фикрича, ҳозир Жанубий Корея президентининг Пелоси билан юзма-юз учрашуви учун жуда ноқулай вақт, чунки бу Пекинни провокация қилиши мумкин.
АҚШга қайтганидан кейин ҳам Пелоси совуқ муносабатга учраши мумкин. Bloomberg маълумотларига кўра, Оқ уй сиёсатчи Тайванга бориш-бормаслик ҳақида мустақил қарор қабул қилиш ҳуқуқига эга, деб баёнот берганига қарамасдан, Байден маъмурияти мансабдорлари Вакиллар палатаси спикери, Пекин билан муносабатлардаги жуда нозик лаҳзага қарамасдан, бу ташрифни ўз карьерасининг муҳим босқичига айлантиришга қарор қилганидан ғазабга келган.
2 август куни Тайванга АҚШ вакиллар палатаси спикери Нэнси Пелоси Осиё турнеси доирасида етиб келди; ташриф Хитой раҳбарияти томонидан кескин танқидга сабаб бўлди, уни провокация деб аташди. Оқ уй эса Пелосининг ташрифи АҚШнинг Хитойга нисбатан сиёсатида қандайдир ўзгариш бўлганини англатмаслигига ишонтирди.
Ўзининг Осиё турнеси ҳақида эълон қилаётиб, Пелоси Тайванни манзиллардан бири сифатида тилга олмаган эди. Оролга келганидан кейин Пелоси бу ерга ташрифидан мақсад «ёрқин ва динамик» демократияни қўллаб-қувватлаш ва АҚШнинг Тайванни қўллаб-қувватлаш ниятини тасдиқлаш бўлганини айтди.
Изоҳ (0)