Наманган вилояти, Норин тумани ҳудудида жойлашган Учтепа-2 археология объекти консервация қилинди, деб хабар бермоқда Маданий мерос агентлиги.
Қайд этилишича, ушбу археология объектини очиқ осмон остидаги музейга айлантириш бўйича таклиф Вазирлар Маҳкамасига киритилиши режалаштирилмоқда. Ушбу объект академик Аҳмадали Асқаров томонидан очиб ўрганилган ва бир қатор тадқиқотлар ўтказилган.
Тадқиқотларга кўра, Учтепа-2 ўрнида қадимги Хайлам шаҳри оташпарастлар ибодатхонаси жойлашгани аниқланди. Ибодатхона милодий VII-VIII асрларга қадар мавжуд бўлган. Қазишма ишлари вақтида роҳиб ва роҳибаларга тегишли суяк қолдиқлари, 50 дан ортиқ ўчоқ излари ҳамда сопол идиш синиқлари топилди.
Учтепа-2 да ўтказилган археологик тадқиқотлар ибодатхона ёнғин натижасида вайрон бўлганини кўрсатди. Руҳонийларга тегишли экани тахмин қилинаётган жасад қолдиқларида эса ўткир тиғли қурол билан етказилган зарба излари топилди. Ушбу топилмалар ва ёнғин излари ибодатхонада жанг олиб борилганини кўрсатиб турибди.
Ушбу тарихий объект келажак авлодга етиб бориши учун Инновацион ривожланиш вазирлиги билан ҳамкорликда Учтепа-2 археология объекти консервация қилинди. Ушбу археология объектининг девор ҳамда том қисмларини иссиқ ва совуқдан сақлаш учун изоляция ишлари амалга оширилиши ва объектда доимий бир хил ҳароратни сақлаш мақсадида совитиш ва иситиш ускунаси ўрнатиш чоралари кўрилмоқда.
Изоҳ (0)