Italiya Moliyaviy gvardiyasi Gelenjik (Rossiyada Qora dengiz bo‘yicha joylashgan kurort-shahar) yaqinidagi “Putin saroyi”ning me’mori Lanfranko Chirilloga tegishli 141 million yevroga teng aktivlarni xatladi, deb yozadi Meduza Italiya OAVlariga tayanib.
Xatlangan mol-mulk ro‘yxatiga uylar, vertolyot, bank aktivlari, naqd pullar, qimmatbaho taqinchoqlar, shuningdek, san’at asarlari, shu jumladan, Pikasso, Sezann va Kandinskiy asarlari kirdi.
Moliyaviy gvardiya xabariga ko‘ra, mol-mulkning xatlanishi soliq qonunbuzarliklari, pul yuvish va aktivlarning soxta ravishda berilishi haqidagi ish doirasida amalga oshirilgan. Me’mor 2013-yildan 2019-yilgacha o‘nlab million yevro daromadi haqida deklaratsiya bermaganlikda gumonlanmoqda. U buni boshqa mamlakat rezidentligini soxta ravishda rasmiylashtirish orqali amalga oshirgan bo‘lishi mumkin.
Press-relizda aytilishicha, surishtiruv Breshia provinsiyasida Rossiyada ro‘yxatga olingan va bojxona jarayonlaridan o‘tmagan vertolyot aniqlanganidan keyin boshlangan.
Lanfranko Chirilloga nisbatan surishtiruv haqida 2022-yil fevralida ma’lum bo‘lgandi. O‘shanda unga tegishli bo‘lgan san’at asarlari va vertolyot xatlangani xabar berilgandi. U 20 yildan ortiq vaqt davomida Rossiyada yashagani va hukumatga “o‘z pozitsiyasini tushuntirib o‘tirmasligi”ni aytgandi. La Repubblica yozishicha, Chirillo “qanchadir vaqt avval” Dubayga ko‘chib o‘tgan . Hozir u qayerdaligiga aniqlik kiritilmayapti.
Lanfranko Chirillo Rossiyada 1990-yillar boshidan 2010-yillar o‘rtalarigacha faol ish olib borgan; Vladimir Putinning farmoni bilan unga Rossiya fuqaroligi berilgan. “Putin saroyi”ni Chirillo, o‘z so‘zlariga ko‘ra, Rossiya prezidenti uchun emas, balki “Stroygazkonsalting” kompaniyasi uchun loyihalashtirgan.
Aleksey Navalniyning Korrupsiyaga qarshi kurash fondi 2021-yil 19-yanvarda “Putin uchun saroy. Eng katta pora tarixi” filmini tarmoqqa yukladi. Qasr hududida kazino, chilimxona, ombor, o‘yin avtomatlari va boshqa ko‘ngilochar maskanlar mavjud.
Izoh (0)