Тошкент ва Сирдарёда ўқишга киритиб қўйиш ва ўқишни кўчириб бериш билан боғлиқ ҳолатлар аниқланди

Ўқишга киритиб қўйиш ва ўқишни кўчириб бериш билан боғлиқ фирибгарлик ҳолатлари фош этилди.

Бош прокуратура ҳузуридаги департаментнинг Шайхонтоҳур туман бўлими томонидан ДХХ ходимлари билан ҳамкорликда ўтказилган тезкор тадбирда, фуқаро Ф.С. бошқа бир фуқаро Ф.ни гўёки юқори лавозимда ишловчи танишлари ёрдамида Ўзбекистон давлат жисмоний тарбия ва спорт университетига ўқишга киритиб қўйиши эвазига фирибгарлик йўли билан 3 000 АҚШ долларини олган вақтида ашёвий далиллар билан ушланган.

Шу каби департаментнинг Сирдарё вилоят бошқармаси ҳамда Ширин шаҳар бўлими томонидан ўтказилган тезкор тадбирда, фуқаро Ф.М. бошқа бир фуқаро С.ни қўшни Қозоғистондаги университетда ўқиганлиги тўғрисида ҳужжат тайёрлаб, Гулистон давлат университетига ўқишини кўчириб бериши эвазига 1 500 АҚШ доллари талаб қилиб, шундан 1 000 АҚШ долларини олган вақтида ашёвий далиллар билан ушланган.

Департамент ҳамда ДХХнинг Бекобод шаҳар бўлимлари томонидан ўтказилган тезкор тадбирда эса, фуқаро И.Х. танишлари ёрдамида бошқа бир фуқаро Ж.нинг ўқишини қўшни Тожикистон Республикасидаги институтдан Тошкент молия институтига ўтказиб бериш эвазига 3 000 АҚШ долларини олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.