Ўзбекистонда ҳар йили 500 нафаргача 14–30 ёшдаги ногиронлиги бўлган ёшларга БҲМнинг 50 бараваригача субсидия ажратилади

Ҳар йили 500 нафаргача 14–30 ёшдаги ногиронлиги бўлган ёшларга БҲМнинг 50 бараваригача (яъни 15 миллион сўмгача) субсидия ажратилади. Бу ҳақда АОКАда ўтказилган брифингда Ёшлар ишлари агентлиги ахборот хизмати раҳбари Нодир Абдуқодиров маълум қилди.

2021 йил 21 декабрь куни Ўзбекистон Республикаси президенти томонидан ногиронлиги бўлган шахсларни ҳар томонлама қўллаб-қувватлаш, уларнинг бандлигига кўмаклашиш ҳамда ижтимоий фаоллигини янада оширишга қаратилган қарор қабул қилинган бўлиб, мазкур қарорнинг 5-бандида Ёшлар ишлари агентлигининг Ёшларга оид давлат сиёсатини қўллаб-қувватлаш жамғармаси маблағлари ҳисобидан ҳар йили 500 нафаргача ногиронлиги бўлган ёшларни ижтимоий қўллаб-қувватлаш мақсадида субсидия ажратиб бориш тизимини жорий этиш вазифаси белгиланган эди.

Ушбу тизимни жорий этиш мақсадида Вазирлар Маҳкамасининг қарори тасдиқланди.

2022 йил 1 августдан бошлаб Ўзбекистон Республикаси Ёшлар ишлари агентлигининг Ёшларга оид давлат сиёсатини қўллаб-қувватлаш жамғармаси маблағлари ҳисобидан ҳар йили 500 нафаргача 14–30 ёшдаги ногиронлиги бўлган ёшларга базавий ҳисоблаш миқдорининг 50 бараваригача (яъни 15 миллионгача) бўлган миқдорда субсидия ажратиш тизими йўлга қўйилади.

Субсидия 2 та йўналишда ажратилади:

• Ногиронлиги бўлган ёшларга ўқиш, яшаш ва транспорт харажатларини қоплаш учун;
• Ногиронлиги бўлган ёшларга асбоб-ускуналар ва меҳнат қуролларини харид қилиш учун.

Ариза берувчи — қарорга мувофиқ субсидия ажратишни сўраб мурожаат қилган ўн тўрт ёшга тўлган ва ўттиз ёшдан ошмаган ногиронлиги бўлган Ўзбекистон Республикаси фуқароси, Ўзбекистон Республикаси ҳудудида яшаш гувоҳномасига эга бўлган чет эл фуқароси ёки фуқаролиги бўлмаган шахс (ўн олти ёшга тўлмаган шахс номидан мурожаат қилган унинг қонуний вакили) томонидан нодавлат таълим ташкилотида ўқиш ёки асбоб-ускуна харид қилиш учун субсидия ажратишни сўраб давлат хизматлари марказига мурожаат қилади ёки Ягона интерактив давлат хизматлари портали орқали Ёшлар ишлари агентлигига бевосита ариза юборади.

Аризаларни қабул қилиш хизмати давлат хизматлари маркази томонидан бепул амалга оширилади.