«Мерос» фильми режиссёри, актёр Ҳилол Насимов нима сабабдан «Мерос» кинокартинасида бош ролни ўғли Фотиҳ Насимовга берганини ва нима сабабдан уни фильмларига олиши ҳақида айтди. Бу ҳақда Кинематография агентлиги «Дарё»га маълум қилди.
«Мерос» фильмида бош ролни ижро этгани ҳақида
«Ўзбекистонда Фотиҳ Насимов менинг ўғлим эканини билишади. Фестивалга борганимизда, тўғри кимлардир яна ўғлини олиб келибди деган бўлиши мумкин, бироқ «Мерос» фильмининг бош рол ижрочиси бўлгани учун улар таклиф қилди. Шу билан бирга йўл ҳаққини тўлашди, озиқ-овқат, жой билан таъминлашди. Шу фильмни кўриб бош рол ижрочисига россиялик режиссёр Сергей Русаковнинг ўзи қарсак чалди. Кейин бу менинг ўғлим дедим», — дейди Ҳилол Насимов.
Ҳилол Насимов нима сабабдан фильмларида ўғлига бош ролни беради?
«Ўзбекни чиройли одатлари билан бирга озгина қитмирлиги бор. Нуфузли тадбирларнинг бирида бир инсон ҳар доим фильмларимга ўғлимни олишимни айтди. Агар ўғлим ролга тўғри келмаса мен уни фильмларимга олмайман. Катта ўғлим ролга тўғри келмади, уни олмадим. Катта ўғлимни ҳеч ким кўрмайди, лекин у ҳам актёрлик соҳасини битирган. Ролга жисмоний жиҳатдан, жасорати тўғри келса, уларга рол бераман. Нима сабабдан олмаслигим керак? Агар у ролни яхши ўйнай олмаган бўлса, эътирози бўлса эркакчасига айтсин», — дейди режиссёр.
Маълумот учун Кинематография агентлиги буюртмасига биноан суратга олинган «Мерос» фильми июль ойида Ҳиндистонда ўтказилган «Олтин тулпор» (Golden Horse Film Festival) халқаро кинофестивалида «Энг яхши хорижий фильм» номинацияси бўйича ғолиб бўлган эди. Фильм ушбу кинофестивалда «Энг яхши режиссёрлик иши» номинацияси бўйича ҳам эътироф этилди. Мазкур фильм май ойида Россияда бўлиб ўтган «Золотой Витяз» кинофорумида «Қозоқ ва ўзбек халқлари ўртасидаги анъана ва муносабатларнинг умумийлиги мавзусини очиб бергани учун» махсус диплом билан тақдирланган.
Изоҳ (0)