«Пулни яхши кўрасизда, шунинг учун санъатдан кетолмайсиз’ дейишади» — Дилдора Ниёзова турмуш ўртоғининг жаҳл устида чиқарган видеоси ва оиласидаги синовли кунлар ҳақида гапирди (видео)

Хонанда Дилдора Ниёзова «Дарё» интернет нашри учун интевю берди. У суҳбат чоғида турмуш ўртоғининг Instagramга жойлаган видеомурожаати, одамлардан ранжигани ва санъатдан кетмаслигининг сабаблари ҳақида гапирди.

— Ҳар бир оилада ўзига яраша синовли кунлар бўлади. Аммо санъаткор таниқли инсон бўлгани учунгина унинг шахсий ҳаётидаги маълумотлар кенг тарқалиб кетади. Дунёда уришмайдиан эр-хотин борми? Видеомурожаатдан аввал турмуш ўртоғим ҳақиқатан рашкчи бўлиб, сал гапим ҳам қаттиқ ботадиган асабий бўлиб қолди. Жаҳлда ақл кетади, деб бекорга айтишмайди. Аёллар барибир оғирроқ бўлмаса, вазият бутунлай изидан чиқиб кетади. Оиланинг мустаҳкамлигини сақлаш осон эмас. Эркакнинг жаҳли чиққанида тез қарор қилиб қўяди.

Турмуш ўртоғим жаҳл устида Instagram’га санъатдан кетишим ҳақида видео жойлади. Ҳар бир оилада тушунмовчиликлар бўлиб туради. Буни тўғри қабул қилиш керак. Турмуш ўртоғимнинг феъли тез бўлгани учун шу видеони жойлаган.

Аммо ўзга оиладаги вазиятни билмай туриб, муносабат билдирадиганлардан ранжидим. «Пулни яхши кўрасизда, шунинг учун санъатдан кетолмайсиз», дейишди. Тўғриси, шунга ўхшаш гаплар қалбимга оғир ботди. Ризқни аввало Аллоҳ беради, санъатда шунча ҳаракат қилиб туриб ҳам ҳеч нарсага эришолмаётганлар бор. Мен тўйларга чиқиб нима ёмон иш қилаяпман. Бировнинг ҳаққига хиёнат қилаётганим йўқ. Санъаткор кичкина пулга хизматга бормайди, аммо одамлар ният қилиб уни яхши кунига таклиф этади. «Одамлар мени тўйига айцин», деб ният қилмайман. Ризқимни фақат Аллоҳдан сўрайман.

Тўйларга оддий кийим ва бошда рўмолим билан бораман. Менимча, бунинг ҳеч қандай ёмон жиҳати йўқ. Тўйга чиқишимнинг асосий сабаби санъатимни яхши кўраман. Агар Аллоҳ истаса, одамлар тўйларига айтмай қўйишади. Чунки хонандалар орасида «Қачон тўйга айтишаркин?» деб умид қилиб ўтирганлар сон мингта. Мени ният қилиб, яхши кунига чақиришаётган экан нега бормаслиги керак.Яқинда бир тўйга боргаимизда онахонлардан бири ёнимга келиб «Хўжайинингиз тўйга чиқармайман, деганди-ку, яна қўшиқ айтаяпсизми?», деб сўради. Эринмай тўйхонада ана шу саволга жавоб бериб кетдим. Микрофонда «Қани орангизда эри билан уришмаган аёллар борми?» десам ҳамма кулиб юборди. Менинг ҳам эрим жаҳли чиққанида гапиради, кўнглини олгандим яна тўйга чиқараяпти, деб кулдим. Ҳўп деб оғирроқ бўлган эдим, яна санъатимни давом эттиришимга рухсат берди, дедим.

Рўмолга катта куч билан кирганман. Ҳақиқатан ҳам ўша вақтда қўшиқ ҳам айтмайман, дегандим. Аммо санъатдан кетдим эмас, фақат саловат ва нашидалар айтаман, деб ҳаёлимдан ўтказгандим. Англадимки, Аллоҳга бўлган муҳаббатимиз қалбимизда, уни ҳа деб атрофдагиларга кўрсатиш шарт эмас. Қўшиқ айтиш тақдир қисматимда бор. Уни ҳам Аллоҳ берган. Агар тақдиримда шундай ёзилмаганида мен бугунги даражага эришмаган бўлардим.Тўй хизматларига борсам «Сизнинг қўшиғингиз сабаб ҳаётга қайтдим», деб ҳаққимга дуо қилишади. Балки қилаётган ишим нотўғри эмасдир, деб ўйлаб қоламан. Банданинг бандага ҳукм қилишга ҳаққи йўқ. Шундай экан у нотўғри иш қиляпти, деб хулоса чиқариш яхши эмас.Мен ҳақимда негатив фикр бирдираётганларнинг хатоси, гуноҳи йўқми? Мен ёмон гапларни эшитиб ўрганмаганман. Негатив гапларни кўнглимга қаттиқ таъсир қилади. Шунинг учун билиб-билмай одамлар ҳақида ёмон гумонга боришларини истамасдим, — дейди хонанда Дилдора Ниёзова.

Мавзуга доир:

Дилдора Ниёзованинг турмуш ўртоғи унинг санъатни бутунлай тарк этгани ҳамда тўйларга чиқмаслигини маълум қилди. Хонанданинг ўзи бу гапларни инкор этди (видео)

«Лицензиямни топширишга тайёр эдим». Дилдора Ниёзова ўранганидан сўнг «Ўзбекконцерт»да бўлган мажлис ҳақида гапириб берди (видео)

Дилдора Ниёзова россиялик миллиардер Алишер Усмонов унинг мухлиси экани ҳақида сўзлаб берди (видео)