Туркиянинг машҳур актёрларидан бири Чағлар Эртуғрул «Фазилат хоним ва қизлари» сериалидаги партнёри Дениз Байсални ўз фильмига таклиф қилмоқчи, Эда Эже, Шеввал Сам «Қора ният» сериалини тарк этаётгани ҳақида миш-мишлар тарқалди, турк матбуоти Исмоил Эге Шашмазнинг хонанда Барис Акасуга ўхшаши ҳақида ёзмоқда. Қуйида шу ва бошқа турк кино оламидаги янгиликлар ҳақида маълумот берилади.
Туба Буюкустун ва Мурат Боз иштирокидаги «Бошқа мен» сериали 28 июль-куни Netflix’да намойиш қилина бошлади. Фильмда Бонжук Йилмаз, Мурат Боз, Риза Кожаўғли, Седа Бакан, Серкан Алтунорак, Туба Буюкустун, Фират Таниш, Фюсун Демирел ва бошқа актёрлар иштирок этган. Фильм намойиш этилгандан бир кун ўтиб Netflix’нинг барча лойиҳалари орасида 12-ўринни эгаллади ва 28 мамлакатнинг сериаллари орасида энг яхши 10 таликка кирди.
Турк матбуоти янги лойиҳада рол ўйнаган актёр Исмоил Эге Шашмазнинг Бариш Акасуга ўхшаши ҳақида ёзди. Бариш Акасу 2000 йил бошидаги машҳур турк рок мусиқачиси ва актёр бўлиб, 28 ёшга тўлишидан бир ой олдин автоҳалокат сабаб вафот этган.
Кубилай Ака ва Ҳазал Эргючлу Туркиянинг Exxen рақамли платформасида «Фақат дўстлар» фильмида бирга суратга тушди. Канал раҳбарияти ушбу лойиҳада Жемре Байсел ва Дениз Жан Акташнинг бирга иштирок этишини режалаштирган эди, бироқ охирги хулосаларга кўра актёрлар таркиби ўзгартирилди.
Яғмур Танрисевсин ва Берк Атан «Учинчи кун» фильмида севишганлар ролини ижро этади. Фильмнинг суратга олиш ишлари 23 июль куни бошланди.
Netflix платформаси учун суратга олаётган Берен Саат ва Киванч Татлитуғ ижросидаги фильмнинг суратга олиш жараёнлари бошланди. Фильмнинг сценарийсини Нуран Эврен Шит ёзган ва унга режиссёр Гёненч Уяник бошчилик қилади. Лойиҳа 19 июль кунидан суратга олина бошлади ва унинг воқеалари дастлаб Шиле шаҳрида, кейин эса АҚШ ва Нью-Йоркда давом этади. Суратга олиш ишлари тугагач, Киванч Star TV телеканали учун OGM Pictures компаниясининг «Қирол ютқазса» сериалида суратга тушади.
«Ташкилот» сериалини тарк этган Чағлар Эртуғрулга янги лойиҳалар продюсерларидан кўплаб таклифлар тушмоқда, бироқ у суратга олиш жараёнларига тайёр эмас. Актёр дам олишга ва эътиборини дўсти билан ёзаётган фильм сценарийсига қаратишни маъқул деб топди. У «Фазилет хоним ва қизлари» ва «Ташкилот» сериалларидаги партнёри Дениз Байсал унинг фильмида рол ўйнашига умид қилмоқда.
Чағлар Эртуғрул «Ташкилот» сериалининг 3-мавсумида суратга тушишдан бош тортгани учун продюсерлар унинг ўрнига бошқа актёр қидирмоқда. Фильм ижодкорлари ҳозирда лойиҳада бош рол ижрочиси бўлишга номзодлик қилаётган бош Серҳат Теоман билан музокаралар олиб бормоқда. Агар актёр рози бўлса, у лойиҳада Чағларнинг ўрнини эгаллайди. Актёр яқинда «Ўғлим» сериалида суратга олиш ишларини якунлади.
«Қора ният» сериали продюсери Шеввални лойиҳада қолишга кўндира олди. Бу ҳақда актриса журналистларга берган интервьюсида айтиб ўтди. Актрисанинг сўзларига кўра сериалнинг 6-мавсуми охиргиси бўлади.
Эда Эже «Қора ният» сериалини тарк этмоқчилиги ҳақида миш-мишлар тарқалди, бироқ у ижтимоий тармоқларда сериалнинг навбатдаги мавсумида суратга тушишини айтди. Берк Октай эса Италиянинг Венеция шаҳрида суратга олинаётган янги «Қуёш нурининг ёрқинлиги» лойиҳасида иштирок этаётгани сабабли бу сериалдаги ишини якунлади.
Бош ролларни Симай Барлас ва Мурат Йилдирим ижро этган «Азиз» сериалининг актёрлар таркибига ўзгариш киритилади. Лойиҳа режиссёри ўзгарди, суратга олиш жараёнини Незакет Жошкун бошқармоқда. Иккинчи мавсумни суратга олиш ишлари бошланди.
«Ишончли» сериалидаги роли орқали мухлислар эътиборига тушган Сила Туркўғли янги иш қидирмоқда. Сўнгги маълумотларга кўра у янги лойиҳада иштирок этиш бўйича шартнома имзоламоқчи. Расмий келишувдан сўнг актрисанинг қайси сериалда иштирок этиши маълум бўлади. Катта эҳтимол билан у «Тузоқ» сериалида рол ижро этади ва унинг партнёри Акин Акинозю бўлади.
Алперен Дуймаз продюсерлик компанияларидан янги лойиҳаларда иштирок этиш учун 2 та яхши таклиф олди. Актёрнинг машҳурлиги кундан-кунга ошиб бормоқда. «Сўнгги ёз» сериалидан кейин Netflix’нинг «Кул» драмаси ва яна бир лойиҳада Фунда Эрйигит билан бирга рол ўйнади. Бундан ташқари у «Агар инсон севса» романтик мелодрамасида ҳам суратга тушди. Актёрнинг мухлислари тез орада уни янги лойиҳаларда кўриши мумкин.
Ушбу жуфтлик «Митти қуш»/«Антепадан» сериалида бирга суратга тушмоқда, актёрлар таркиби тасдиқланди ва суратга олиш гуруҳи иш бошлади. Сериалнинг куз-қиш мавсумига тайёргарлик ишлари қизғин давом этмоқда.
Италия телеканалларининг бирида 14 сентябрдан Жан Яман иштирокидаги «Денгиздек бинафшаранг» сериали намойиш этила бошлайди. Бу унинг итальян лойиҳасидаги биринчи бош роли бўлиб, унинг Италия кино оламидаги муваффақияти сериалнинг тақдирига боғлиқ.
Мавзуга доир:
- Фото: Машҳур турк сериаллари қандай жойларда суратга олинади?
- Энгин Акюрек ва Эда Эже жуфтлиги, Италияда ресторан очаётган Жан Яман: турк ижодкорларининг янги лойиҳа ҳамда режалари (фото)
- 2022—2023 йиллар куз-қиш мавсумида томошабинлар эътиборига ҳавола этилиши кутилаётган турк фильмлари (фото)
- Ўзбекистонда Октай Кайнаржа иштирокида ишланаётган сериал, янги мавсумда томошабинлар хайрлашадиган қаҳрамонлар. Турк киноси янгиликлари
Изоҳ (0)