Калифорния губернатори Гевин Нюсом маймунчечак эпидемияси сабабли фавқулодда ҳолат эълон қилди. Бу ҳақда штат раҳбарининг матбуот хизматига таяниб, «РБК» хабар берди.
«Нюсом маймунчечак эпидемиясига қарши кураш доирасида штатда эмлаш ишларини осонлаштириш мақсадида бугун фавқулодда ҳолат эълон қилди», — дейилади хабарда.
Расмий маълумотларга кўра, штатга чечакка қарши 61,000 дозадан ортиқ вакцина келтирилган, шундан 25,000 дан ортиғи аҳолини эмлашга ишлатиб бўлинган.
30 июль куни Нью-Йорк губернатори Кети Хочул маймунчечак тарқалиши сабабли фавқулодда ҳолат эълон қилган эди. Унинг аниқлик киритишича, Қўшма Штатларда маймунчечак билан касалланган ҳар тўрт одамдан бири Нью-Йорк штатига тўғри келмоқда.
АҚШ Касалликларни назорат қилиш ва олдини олиш марказларининг маълумотларига кўра, Қўшма Штатларда маймунчечак билан касалланиш бўйича жами 5811 та ҳолат аниқланган, шундан 1390 таси Нью-Йоркда қайд этилган. Касалланиш кўрсаткичи бўйича ушбу штат етакчилик қилмоқда. Ундан кейин Калифорния (827 киши).
АҚШ президенти Жо Байден эпидемия сабабли бутун мамлакат бўйлаб фавқулодда ҳолат жорий этиш масаласини кўриб чиқмоқда, деб ёзганди The Washington Post манбаларига таяниб. 23 июль куни ЖССТ маймунчечак эпидемиясини глобал соғлиқни сақлаш соҳасидаги фавқулодда ҳолат деб эълон қилган.
Изоҳ (0)