Дубайнинг йўллар ва транспорт бошқармаси уч нафар ходим – икки такси ҳайдовчиси ва бир автотураргоҳ инспекторига ҳалоллиги ва гўзал хулқ-атвори учун мукофотлар топширди.
Автотураргоҳ инспектори Обид Мифтаҳ Абдуллоҳ ўз вазифаларини фидойилик ва сидқидилдан бажаргани учун тақдирланди. Дубай такси корпорацияси ходими Нэнси Орго йўловчи таксида қолдириб кетган ва ичида 1 миллион дирҳам (272 минг доллар) бўлган сумкани қайтарган. Ҳайдовчи Умар Алтаф Ҳусайн эса салонда унутиб қолдирилган ҳамённи йўловчига қайтариб берган.
Ҳуқуқ-тартибот идоралари ходимлари йўқолган пул ёки қимматбаҳо нарсаларни топширган ҳалол фуқароларни мунтазам равишда рағбатлантиради. Ўнлаб бундай ҳолатлар кузатилади. 2022 йил апрель ойида Дубай полицияси йўловчи томонидан унутилган пул, паспорт ва бошқа ҳужжатлар солинган сумкани қайтариб берган такси ҳайдовчисининг ҳалоллиги учун мукофотлаган эди. Ҳайдовчи Абдул Ражив топилмани энг яқин полиция бўлимига келтириб берган эди.
2022 йил март ойида Дубай полицияси мактаб ўқувчисининг ҳалоллиги учун мукофотлади — у супермаркетдан топилган ҳамённи эгасига қайтарган эди, деб ёзмоқда Khaleej Times.