Янги Зеландия ҳукумати Украинадаги уруш туфайли Россияга қарши санкцияларни кенгайтиргани ҳақида эълон қилди.
«Санкциялар СОГАЗ суғурта компанияси, «Россия темир йўллари» компанияси ҳамда Россия Қуролли кучлари учун ҳарбий техникаларни ишлаб чиқиш, ишлаб чиқариш ва синовдан ўтказиш билан шуғулланувчи мудофаа корхоналарига нисбатан жорий этилмоқда», — дейилади Янги Зеландия ТИВ баёнотида.
Янги Зеландиянинг Россияга қарши санкциялари кенг кўламли чора-тадбирларни ўз ичига олади, жумладан, саёҳатни тақиқлаш, активларни музлатиш, молиявий операцияларни тақиқлаш, мамлакатга рус кема ва самолётларининг киришини тақиқлаш каби. Шунингдек, чекловлар Янги Зеландия жисмоний ва юридик шахслари учун Россия Қуролли Кучларига, унинг мудофаа корхоналарига санкцияларга дучор бўлган товарлар ва хизматларни кўрсатишни тақиқлайди.
Аввалроқ Янги Зеландия россиялик жисмоний шахслар, молия институтлари ва мудофаа корхоналарини санкциялар рўйхатига киритган эди. Хусусан, санкциялар остида қолган юридик шахслар орасида «Газпром», жисмоний шахслар орасида эса Россия Мудофаа вазирлигининг расмий вакили Игорь Конашенков, Россия Бош штаби Бош разведка бошқармаси бошлиғи Игорь Костюков, Бутунроссия давлат телерадиокомпанияси бош директори Олег Добродеев, «Красная звезда» медиахолдинги президенти Алексей Пимановлар бор эди.
Изоҳ (0)