Бирлашган Миллатлар Ташкилотининг Конго Демократик Республикасидаги барқарорлик миссияси аъзолари Уганда билан чегарада ўт очди. Бу ҳақда Deutsche Welle хабар берди.
БМТ мамлакат шарқида ташкилотга қарши норозилик намойишлари чоғида бир неча киши ҳалок бўлгани ва кескинлик кучайгани, шундан сўнг БМТ тинчликпарвар кучлари ўт очгани, бунинг оқибатида эса икки киши ҳалок бўлгани ҳақида хабар қилганди.
БМТ Бош котиби Антониу Гутерриш бу хабардан ғазабланганини ва одамларнинг ўлимидан ташвишда эканини айтди. Миссия веб-сайтидаги баёнотда айтилишича, Гутерриш «айбдорларни жавобгарликка тортишни» талаб қилган.
БМТ миссияси баёнотига кўра, бу сафар тинчликпарвар кучларнинг аралашув бригадаси аскарлари таътилдан қайтаётганда Уганда билан чегара постида тушунарсиз тарзда ўт очган ва уни ёриб ўтган. Казандидаги Шимолий Киву губернатори матбуот котиби Бартелеми Камбале Сиванинг айтишича, саккиз киши, жумладан икки полициячи оғир яраланган.
«Ҳукумат БМТ тинчликпарвар кучлари билан биргаликда бундай жиноят сабабларини аниқлаш ва қонунбузарларга қаттиқ жазо тайинлаш учун тергов бошлади», — деди ҳукумат матбуот котиби Патрик Муай.
БМТ Бош котибининг Конго бўйича махсус вакили Бинту Кейта гумондорлар қўлга олинганини билдириб, суд жараёнини бошлаш учун аскарлар келиб чиққан мамлакатлар билан алоқа ўрнатилганини айтди.
Конго Демократик Республикаси ҳукумати вакили Патрик Муаянинг айтишича, ҳибсга олинган аскарлар тергов тугагунига қадар БМТ тинчликпарвар миссиясидан чиқарилади.
Эслатиб ўтамиз, Конго Демократик Республикасининг шарқий минтақасида 120 дан ортиқ турли қуролли гуруҳлар фаолият юритади. БМТ Кузатувчилар миссияси биринчи марта 1999 йилда ишга туширилган. 2010 йилда бу миссия БМТнинг Конгода барқарорликни таъминлаш бўйича тинчликпарвар миссиясига айланди ва ҳужум операцияларига рухсат бериш ваколатига эга бўлди.
Ўтган ҳафта мамлакат шарқидаги Гома ва Бутембо шаҳарларида миссияга қарши намойишлар зўравонликка айланди, чунки ғазабланган маҳаллий аҳоли БМТ тинчликпарвар кучлари маҳаллий аҳоли хавфсизлигини таъминлай олмаётгани учун норозилик билдирди. Намойиш пайтида 19 нафардан ортиқ одам, жумладан, БМТ миссиясининг уч аъзоси ҳалок бўлди. Намойишчиларнинг баъзилари БМТ миссияси ходимларининг уларга қарата ўт очиши оқибатида ҳалок бўлган.
Изоҳ (0)