«Дарё» таҳририятига келиб тушган маълумотга кўра, «Аҳмадбой» воқеасида айбланиб, қамоқ жазосини ўтаб қайтган шахс яна фирибгарлик қилгани учун қамоққа олинган. У ўзгаларнинг мол-мулки ва маблағларини олиб, бир йил давомида икки баравар қилиб қайтариш шарти билан ўзлаштириб келган. Ушбу ҳолатга аниқлик киритиш мақсадида «Дарё» мухбири Тошкент вилояти ички ишлар бош бошқармаси ахборот хизмати билан боғланди.
Бошқарманинг ахборот беришича, ҳақиқатан ҳам хавфли рецидивист Н.Б. Тошкент вилоятининг Чиноз туманида февраль ойида ўтказилган тезкор тадбирда фирибгарлик йўли билан пул маблағини олаётган вақтда ушланган.
У аризачининг Spark автомашинасини 6 минг 500 долларга баҳолаб, қўшимча 2 минг доллар олишга келишган. Умумий миқдорда 8 минг 500 долларни 10 ой давомида ҳар ойдан 1 минг 700 доллардан, жами 17 минг доллар миқдорида қайтариб беришни ваъда қилган.
Айбланувчи Н.Б. Чиноз туманида жойлашган автомашиналарга ёнилғи қуйиш шохобчаси ёнида аризачидан Spark автомашинаси ҳужжатлари ҳамда 2 минг долларни олган вақтда ашёвий далиллар билан ушланган.
Тергов ҳаракатлари давомида Н.Б ўз кўрсатмасида 2021 йилнинг декабрь ойида озодликка чиққанидан сўнг шу кунгача 10 нафардан ортиқ фуқаронинг автомашина, чорва моллари ва нақд пулларини маълум муддатда тан нархидан кўпайтириб бериш шарти билан олганлигини маълум қилган.
Н.Б.га нисбатан Жиноят кодексининг 25,168-моддаси 3-қисми «а,б» (фирибгарлик – кўп миқдорда, такроран ёки хавфли рецидивист томонидан) ва 4-қисми «а» банди (жуда кўп миқдорда) билан айбланувчи тариқасида ишга жалб қилинган. Айбланувчига нисбатан қамоққа олиш тарзидаги эҳтиёт чораси қўлланган.
Жиноят иши бўйича айбланувчи Н.Б. фуқаролардан жами 1 миллиард сўмлик қорамол, автомашиналарни фирибгарлик йўли билан қўлга киритганлиги аниқланган. Ушбу фуқаролар жиноят иши бўйича жабрланувчи ва фуқаровий даъвогар деб эътироф этилган.
Мазкур жиноят иши Жиноят ишлари бўйича Чиноз туман судига юборилган.
Маълумот учун, «Аҳмадбой васвасаси» — Ўзбекистондаги энг шов-шувли молиявий пирамида асосчиси Аҳмаджон Турсунбоев фаолияти хронологияси эълон қилинган эди.
Унда Ўзбекистондаги энг шов-шувли молиявий пирамида асосчиси Аҳмаджон Турсунбоев ҳақида эшитмаган одам бўлмаса керак. «Чинозлик Аҳмадбой» номи билан машҳур ишбилармоннинг «тўри»га илиниб, чув тушган фуқаролар ҳам мингдан кўп. Унинг 2006 йилда бошланган ноқонуний фаолияти ўн йилдан кейин — 2016 йилнинг ёзида фош бўлади. «Дарё» ҳозирда жазо муддатини ўтаётган Аҳмадбойнинг «тадбиркорлик» иши билан боғлиқ барча тафсилотларни бир саҳифага жамланган.
Изоҳ (0)