Болливуд кино оламида шундай актёр ва актрисалар борки, улар бирга иштирок этган фильмлар дунё бўйлаб машҳурликка эришган ва миллионлаб мухлисларнинг қалбини забт этган. Шундай жуфтликлардан бири Шоҳрух Хон ва Кажол ижросидаги фильмлар томошабинлар томонидан севиб кўрилади ва суратга олинганига бир неча йил бўлишига қарамай юқори рейтингларни забт этиб келади. Қуйида жуфтлик партнёрлигидаги энг яхши фильмлар берилади.
«Ўғирланмаган келин» кинофильми
Ушбу фильмда Симран, яъни Кажол дўстлари билан саёҳатга боради ва шу вақт оралиғида унаштирилган бўлишига қарамай Раж исмли йигитни ёқтириб қолади. Йигит ҳам уни ёқтириб қолганини айтганда Симран унга отаси билан дўст бўлган инсоннинг ўғлига унаштирилганини айтади. Қиз уйга қайтганидан кейин ҳам йигитни унутмайди ва барча воқеани онасига айтиб беради. Йигит ҳам ўз севгиси учун курашади ва қиз билан учрашади. Қиз отасининг йигит билан турмуш қуришига қарши эканини билиб йигитга уни ўғирлаб кетишини айтади. Раж ролини маҳорат билан ўйнаган Шоҳрух Хон Кажолга отасининг розилигисиз у билан турмуш қурмаслиги ҳақида гапиради. Қизнинг отаси барчасидан хабар топади ва йигитни уйидан ҳайдаб юборади. Ушбу фильмнинг якунида Кажолнинг отаси қизини мажбурлаб бошқасига бермаслигини тушуниб етади ва қизининг Раж билан турмуш қуришига рози бўлади.
«Ҳаётда ҳамма нарса бўлади» фильми
Шоҳрух Хон ва Кажол иштирокидаги «Ҳаётда ҳамма нарса бўлади» фильмида дўстлик ва муҳаббат каби инсоний ришталар бир-бири билан алоқадор эканини билиб олиш мумкин. Фильмда Шоҳрух Хон ва Кажол коллежда бирга ўқийдиган қадрдон дўстлар ролини ижро этади. Анжели ва Раҳулнинг ҳаётига коллеж директорининг қизи, яъни Тина кириб келиши билан барчаси ўзгариб кетади. Анжели болалар каби шўх феъл-атворга эга қиз бўлади. У Тина билан танишгандан кейин Раҳулни севиб қолганини тушуниб етади. Лекин Тина ва Раҳул ўртасида тўсиқ бўлмаслик учун коллежни тарк этади. Орадан йиллар ўтиб, Тина Анжели исмли қизига васият тарзида бир вақтлар ўз севгисини қурбон қилган дугонаси ҳамда Раҳулни яраштиришни сўрайди. Фильм якунида Раҳул ва Анжели турмуш қуради.
«Фирибгар» кинокартинаси
Режиссёр Аббас Бурмавалланинг 1993 йилда суратга олинган «Фирибгар» кинофильмида Шоҳрух Хон ота-онаси, синглиси учун оиласининг барча бойликларини тортиб олган оиладан қасос олишга ҳаракат қилади. У бунинг учун ташқи кўриниши, исмини ўзгартиради ва отасининг бойлигини тортиб олган инсоннинг икки қизидан қасд олишга ҳаракат қилади. Оиласининг бойликларини тортиб олган инсоннинг катта қизини алдаб юради ва кейин уни ўлдиради. Қиз вафот этганидан кейин актёр унинг синглиси ролини ижро этган Кажол билан турмуш қуради. Орадан вақт ўтиб Кажол Шоҳрух Хоннинг барча жиноятларини билиб қолади ва унинг уйига боради. Шоҳрух Хон ҳам Кажолга отасининг барча жиноятларини айтиб беради.
«Гоҳо шодлик, гоҳо ғам» фильми
Режиссёр Каран Жоҳарнинг 2001 йилда суратга олинган «Гоҳо шодлик, гоҳо ғам» фильмида Шоҳрух Хон камбағал оиланинг қизи Кажолни ёқтириб қолади. Унинг отаси эса қизга уйланса, йигитнинг уйдан кетишини ва ундан воз кечишини айтади. Шоҳрух Хон қизга уйланади ва уйини тарк этади. Орадан бир неча йил ўтиб Шоҳрух Хоннинг укаси уни уйга, ота-онасининг олдига қайтаришга ҳаракат қилади. Фильмда унинг укаси ролини Болливуднинг таниқли актёри Ритик Рошан ижро этган. Акасининг уйига борган Ритик Рошан келинойисининг синглисини, яъни Карина Капурни яхши кўриб қолади. Фильм якунида Шоҳрух Хон ота-онасининг уйига қайтади ва кечирим сўрайди.
«Менинг исмим Хон» кинофильми
Бу фильмда Шоҳрух Хон ҳам, Кажол ҳам ўзгача феъл-атворга эга бўлган образларни гавдалантирган. «Менинг исмим Хон» кинокартинасида севги-муҳаббат, Ватан туйғуси ва бошқа инсон учун зарур бўлган умумбашарий туйғулар ифода этилганини кўриш мумкин. Ушбу фильм режиссёр Каран Жоҳарнинг энг муваффақиятли фильмлари қаторига киритилди, унинг умумий бюджети 12 миллион долларни ташкил қилди. Кинокартинада ҳиндистонлик мусулмон Ризвон Хон Сан-Францискога кўчиб ўтади ва укаси, келини билан бирга яшайди. Аспергер синдромидан азият чеккан Ризвон Мандирани севиб қолади. Оиласининг норозилигига қарамай, улар турмуш қуради ва биргаликда кичик бизнес бошлайди. Улар 2001 йилнинг 11 сентябрига қадар, мусулмонларга муносабат кескин ўзгарганига қадар бахтли яшайди. Мандира бу фожиадан эзилади, шу сабаб уларнинг муносабатлари бузилади. Шундан кейин Ризвон Америкага боради.
«Каран ва Аржун» кинокартинаси
Актёр, режиссёр Ракеш Рошан томонидан суратга олинган, 1995 йилда катта экранларга чиққан «Каран ва Аржун» кинофильмида Шоҳрух Хон ва Кажол биргаликда рол ижро этган. Жанговар ва романтик йўналишдаги ушбу фильмда Салмон Хон, Амриш Пури, Мамта Кулкарни каби Болливуд юлдузлари ҳам иштирок этган. Камбағал оилада вояга етган Шоҳрух Хона Кажолни яхши кўриб қолади, Кажолни эса мажбурлаб бошқа йигитга турмушга беришмоқчи бўлади. Шоҳрух Хон ўз севгиси йўлида кўплаб қийинчиликларга дуч келади.
«Севишганлар» фильми
Ҳиндистоннинг машҳур режиссёрларидан бири Роҳит Шетти томонидан 2015 йилда суратга олинган «Севишганлар» фильми Шоҳрух Хон ва Кажол иштирокидаги энг яхши фильмлардан бири ҳисобланади. Фильмда улар бир-бирига душман бўлган оиланинг фарзандлари ролини ижро этган. «Севишганлар» кинокартинасида Кажол Шоҳрух Хондан олтинларни тортиб олиш мақсадида уни алдайди, олтинларни қўлга киритгач эса Шоҳрух Хонни ёқтириб қолганини тушуниб етади, актриса ундан кечирим сўрайди. Шундан кейин актёр қизнинг отаси билан кўришишга қарор қилади ва унинг олдига боради. Қизнинг отаси уни ўлдирмоқчи бўлади, бироқ тасодифан отилган ўқ ўзини ўлдиради. Шу пайт Кажол кириб келади ва Шоҳрух Хоннинг қўлида тўппончани кўриб отасини у ўлдирган деб ўйлайди ва актёрга қарата ўқ узади. Йигит тирик қолади ва қизга барчасини тушунтирмоқчи бўлганда унга қиз бошқа шаҳарга кўчиб кетганини айтишади. Орадан бир неча йиллар ўтиб йигитнинг укаси ва қизнинг синглиси бир-бирини ёқтириб қолади. Кажол ва Шоҳрух Хона яна қайта учрашади. Фильм якунида Кажол ва Шоҳрух Хон, шу билан бирга уларнинг укаси ва синглиси ҳам турмуш қуради.
Мавзуга доир:
Изоҳ (0)