Қурилиш материаллари саноатининг инновацион салоҳиятини оширишга мамлакат ижтимоий-иқтисодий ривожининг муҳим омили сифатида қаралаётгани катта натижаларга омил бўлмоқда. Бу борада масъул муассасалардан бири бўлган «Ўзсаноатқурилишбанк» томонидан қайд этилишича, жорий йилнинг биринчи ярмида қиймати 995 миллион долларлик 181 та лойиҳа молиялаштирилиб, 87 та лойиҳа ишга туширилди.
Президентнинг 2021 йил 9 июндаги «Ҳудудларнинг саноат салоҳиятини оширишга доир қўшимча чора-тадбирлар тўғрисида»ги фармонида қурилиш материаллари ишлаб чиқариш соҳасини янги босқичга кўтаришнинг барча ташкилий-амалий механизмлари белгилаб берилди.
Корхоналарнинг иқтисодий самарадорлигини ошириш, рақобатбардош ва экспортбоп маҳсулотлар ишлаб чиқаришни кучайтиришга қаратилган бошқарув тизими ва манзилли стратегия ишлаб чиқилди.
«Ўзсаноатқурилишбанк» томонидан мазкур фармон асосида амалга оширилган ишлар натижасида, жорий йилнинг 1 июль ҳолатига кўра, 14,4 триллион сўмлик қурилиш материаллари ишлаб чиқарилиб, ўтган йилга нисбатан 1,9 триллион сўмга ошди. Шундан 459 миллиард сўмлик маҳсулот маҳаллийлаштириш дастури доирасида истеъмолчиларга етказиб берилди, шу йилга мўлжалланган тармоқни ривожлантириш бўйича белгиланган мақсадли кўрсаткичлар ортиғи билан бажарилди. Бунда 560 миллион доллар ҳажмида хорижий ва маҳаллий инвестицияларнинг ўзлаштирилганлиги алоҳида аҳамиятга эгадир.
Таъкидлаш жоиз, 2022 йилда соҳада 1,8 миллиард долларлик (шу жумладан, лойиҳа ташаббускорларининг ўз маблағлари – 642 миллион доллар, банк кредити – 473 миллион доллар, хорижий инвестициялар – 708 миллион доллар) 420 та инвестиция лойиҳасини амалга ошириш, тармоқ корхоналари томонидан 27,6 триллион сўмлик маҳсулотлар ишлаб чиқариш ва шу орқали 15 533 та янги иш ўрнини ташкил этиш кўзда тутилган.
Шунга биноан, бугунги кунга қадар тижорат банклари билан биргаликда қиймати 995 миллион долларлик (ўз маблағлари – 403 миллион доллар, банк кредити – 422 миллион доллар, хорижий инвестициялар – 170 миллион доллар) 181 та лойиҳа молиялаштирилиб, 87 та лойиҳа ишга туширилди.
Жумладан, Андижон вилоятида иш бошлаган «Vodiy Plast Pro» МЧЖнинг қиймати 3 миллион доллар бўлган, йиллик қуввати 50 минг метрлик труба маҳсулотларини ишлаб чиқариш лойиҳаси «Ўзсаноатқурилишбанк» томонидан молиялаштирилган бўлса, шу ҳудудда 200 та янги иш ўрнини ташкил этган GSR Building Materials МЧЖнинг қиймати 50 миллион долларлик лойиҳаси (йиллик қуввати 1 миллион тонналик цемент ишлаб чиқариш) «Халқ банки»нинг молиявий мадади билан ишга туширилди. Шунингдек, Қашқадарё вилоятидаги «Qarshi Conch Cement» хусусий корхонасининг қиймати 150 миллион долларлик, йиллик қуввати 1,2 миллион тоннага тенг цемент ишлаб чиқариш лойиҳаси ҳам истиқболли лойиҳалар қаторида «Ўзбекистон Республикаси Ташқи иқтисодий фаолият миллий банки» томонидан молиявий қўллаб-қувватланди.
Йил якунига қадар банклар томонидан яна 46 та лойиҳага 43,7 миллион доллар миқдорида кредитлар ажратилиши мўлжалланган. Бунда лойиҳалар мазмуни асосан цемент (17,6 миллион тонна), қурилиш ойнаси (32 миллион квадрат метр), керамик плиткалар (24 миллион квадрат метр), гипсокартон (73 миллион квадрат метр), гулқоғоз (3 миллион ўрам) ва бошқа маҳсулотлар ишлаб чиқаришни ўз ичига олади.
Соҳада ишлаб чиқариш самарадорлигини ошириш, тармоқ корхоналарини модернизациялаш, техник ва технологик жиҳатдан янгилаш, маҳаллий хом ашёни чуқур қайта ишлаш жараёнига илғор технологияларни жорий этиш каби тизимли ислоҳотлар қурилиш материаллари саноатида экспорт-импорт амалиётларининг ҳам ривожига ҳисса қўшмоқда.
Хусусан, жорий йилнинг биринчи ярмида тармоқда маҳсулотлар ва хизматлар экспорти ҳажми 267 миллион долларни ташкил этиб, белгиланган режа кўрсаткичи 114,7 фоизга бажарилди. Бу кўрсаткич қурилиш материалларини хориж бозорига олиб чиқиш ўтган йилнинг мос даврига нисбатан 118,2 миллион доллар ёки 1,8 баробарга ошганлигини билдиради.
Шунингдек, 277 миллион долларлик қурилиш материаллари импорт қилиниб, мазкур амалиётлар ўтган йилнинг мос даврига нисбатан 14,5 миллион долларга камайган.
Маълумки, давлат раҳбарининг юқоридаги фармони билан мамлакатимизнинг норуда минераллар хом ашё базасини ўзлаштириш имкониятларидан тўлиқ фойдаланиш мақсадида 24 та туман (шаҳар)ни қурилиш материаллари ишлаб чиқаришга ихтисослаштириш, ушбу ҳудудларда зарур ер участкаларини ажратган ҳолда қурилиш материалларини ишлаб чиқариш лойиҳаларини амалга ошириш мақсадида кичик саноат зоналарини ташкил этиш белгиланган.
Бугунги кунда ихтисослаштирилган туманларда амалга оширилиши режалаштирилган қиймати 150,9 миллион долларлик (шундан банк кредити 89,6 миллион доллар) 58 та лойиҳанинг рўйхати шакллантирилди.
Сариосиё туманида кичик саноат зонасини ташкил этиш бўйича дастлабки қурилиш ишлари бошлаб юборилди. Жорий йил якунига қадар қолган 7 та туманда ҳудудий ҳокимликлар билан биргаликда индустриал зоналар ташкил этиш ишлари давом эттирилади.
Айни пайтда қурилиш материаллари соҳасини ривожлантиришдаги саъй-ҳаракатлар «Тадбиркорлар мактаби» фаолияти мисолида ҳам қизғин тус олган. «Ўзсаноатқурилишбанк» томонидан «Ўзсаноатқурилишматериаллари» уюшмаси билан ҳамкорликда ташкил этилган ушбу марказда тингловчилар малакасини баҳолаш ҳамда миллий квалификация тизими тўлақонли жорий этилган.
Туркиянинг Maltepe университети билан биргаликда йилига 400 нафар соҳа вакилини ўқитиш белгилаб олинган. Марказда ўтган ўқув мавсумларида жами 140 нафарга яқин кенг жамоатчилик вакиллари ўз билим ва малакаларини ошириб, махсус сертификатга эга бўлишди.
Ҳозирда «Тадбиркорлар мактаби»да саккизинчи мавсум учун қабул эълон қилинган.
Реклама ҳуқуқи асосида.
Изоҳ (0)