Наманган вилоятида ўтказилган InnoWeek–2022 инновацион ғоялар кўргазмасида қандай натижаларга эришилди?

Инновацион ривожланиш вазирлиги Инновациялар миллий офиси томонидан ташкиллаштирилаётган InnoWeek–2022 инновацион ғоялар ҳудудий кўргазмаси бутун республика бўйлаб ўтказилмоқда. Бу эса, албатта, республикадаги тадбиркорлар ва ёш стартап эгалари учун катта имкониятларни яратиб бермоқда.

Хусусан, 20—21 июль кунлари Наманган вилоятида InnoWeek–2022 инновацион ғоялар кўргазмаси ташкил этилди ҳамда кўргазма доирасида иқтидорли ёшларни қўллаб-қувватлаш бўйича TechnoWays технологик ривожланиш марафони ўтказилди. Кўргазманинг тантанали очилиш маросими Наманган вилояти маданият маркази биносида бўлиб ўтди.

Кўргазмада 107 турдаги текстил, озиқ-овқат, қурилиш материаллари, электротехника, чарм-саноат, фармацевтика, робототехника каби йўналишлардаги инновацион ишланмалар ва маҳсулотлар намойиш этилди. Шундан Наманган вилоятидаги олий таълим муассасаларининг 60 нафар иштирокчилари томонидан 72 турдаги ва 31 та тадбиркорлик субъектлари томонидан 35 турдаги маҳсулотлар намойиш этилди.

Шунингдек, кўргазма доирасида иқтидорли ёшларни қўллаб-қувватлаш мақсадида ташкил этилган TechnoWays технологик ривожланиш марафонида жами 53 нафар иқтидорли ёшлар ўзларининг инновацион ғоялари ва ишланмалари билан иштирок этишди. Иштирокчиларга ўқув семинарлари, технологик турлар ташкиллаштирилди. Энг яхши лойиҳага эга 3 та иштирокчи саралаб олиниб рағбатлантирилди.

Бундан ташқари, кўргазма доирасида Наманган вилоятидаги Nam Smart Service Oil МЧЖ ва Қирғизистон Республикасининг ОсОО «МасМет» ўртасида импорт ўрнини босувчи инновацион маҳсулотлар — автомобиль двигателлари етказиб бериш бўйича экспорт шартномаси, шунингдек, TM Fish Fresh МЧЖ ва «Биржа Таъминот» МЧЖ ўртасида балиқ-фарш маҳсулотларини етказиб бериш бўйича 450,0 миллион сўмлик шартнома имзоланди.

Тадбирдан кўзланган асосий мақсад, тадбиркорларни, ишбилармон ва ёш олимларни, стартап эгаларини битта майдонга тўплаш, улар учун имкониятлар яратиш, лойиҳаларни ривожлантиришда кўмакчи бўлиш эди ва бу жуда яхши уддаланди. Яқин кунларда қолган ҳудудлардан ҳам катта натижаларни кутиб қоламиз.

Кўргазмадан асосий мақсад, халқаро бозорда ҳар бир лойиҳанинг потенциал харидорини топишдир. Шу сабабли барча лойиҳалар, ҳар бир ҳудуднинг ўзида алоҳида кўриб чиқилиб, саралаб олинмоқда.

Реклама ҳуқуқи асосида.