Mobiuz «Алоқада» лойиҳасини бошлади

Видео лойиҳа доирасида мобил алоқа оператори техник блокнинг фаолияти ва ривожланиши ҳақида қизиқарли маълумотлар билан бўлишиб боради.

Одамлар мобил алоқадан фаол фойдаланадилар, аммо у қандай тарзда йўлга қўйилиши кўпчилик учун номаълум. Таянч станцияси нима, техник ходимлар томонидан қандай ишлар амалга оширилади, у ёки бу ҳудудда қачон ва қанча техник воситалар ишга туширилади – «Алоқада» лойиҳаси шу ва бошқа кўплаб саволларга жавоб беради.

Лойиҳанинг биринчи сонида суратга олиш гуруҳи Тошкент вилоятига ташриф буюриб, Ўзбекистондаги энг баланд таянч станциялардан бирининг чўққисига чиқишди. Чиноз туманида жойлашган Mobiuz радиореле станциясининг баландлиги 85 метрни ташкил қилади. Техник мутахассислар кўтарилиши мумкин бўлган энг баланд платформа 80 метр баландликда жойлашган. Тасвирга олиш гуруҳи ана шундай баландликка кўтарилишни мақсад қилган.

Видео лойиҳа давомида таянч станциясининг қабул қилувчи ва узатувчи ускуналари намойиш этилди. Улар Чиноз ва Янгийўл туманларининг кўплаб аҳоли пунктлари, М-34 автомобиль йўлининг 8 километрлик қисмига хизмат кўрсатади ҳамда сифатли алоқа ва интернет билан таъминлайди. Абонентларга хизмат кўрсатиш учун бундай панелли антенналар 31 метр баландликда жойлашган.

Объектнинг яна бир муҳим вазифаси, транспорт алоқасини таъминлашдир. Тошкент шаҳридан келаётган сигналлар радиореле алоқа линиялари орқали Тошкент вилоятининг жанубий туманларига, шунингдек, Сирдарё вилоятига узатилади. Тегишли ускуналар 75 метр баландликда жойлашган.

«Алоқада» лойиҳасининг биринчи сони доирасида Тошкент вилояти Оққўрғон туманидаги «Элтамғали» қишлоқ фуқаролар йиғинидаги янги Mobiuz таянч станцияси ҳам намойиш этилди. У яқинда тижорий фойдаланишга топширилиб, қишлоқ аҳолисини юқори сифатли алоқа ва 4G LTE мобил интернети билан таъминлаш имконини бермоқда.

«Ўзбекистоннинг барча ҳудудларини лойиҳамиз билан қамраб олишни режалаштирганмиз. Мақсадимиз, мутахассисларимиз фаолиятини ичкаридан кўрсатиш. Об-ҳаво шароити, жойлашув, ҳар қандай ташқи шарт-шароитларга қарамай, улар 24/7 режимида алоқани таъминлаб келмоқда. Тасвирга олиш гуруҳи аъзолари техник ходимларимиз фаолиятидаги барча қийинчиликларни бошдан кечирадилар ва энг муҳими, буни имкон қадар томошабинларга намойиш этадилар», — дейди лойиҳа координатори, Mobiuz матбуот котиби Сардор Тожиев.

Лойиҳани Mobiuz YouTube каналида кузатиб боришингиз мумкин.

Реклама ҳуқуқи асосида.