Италия парламентига муддатидан олдин сайловлар 25 сентябрда бўлиб ўтади. Тегишли фармонни Италия президенти Сержо Маттарелла имзолади, дея хабар бермоқда Aksanews.
Аввалроқ Маттарелла парламентни тарқатиб юбориш тўғрисидаги фармонни имзолаган эди. Уни тарқатишга мамлакат ҳукуматидаги бўлиниш ва бунинг ортидан бош вазир Марио Драгининг истеъфога чиқиши сабаб бўлди.
Президент канцеляриясининг маълум қилишича, ҳукуматнинг амалдаги таркиби «жорий муаммоларни ҳал қилиш» ваколатларини амалга оширишда давом этади.
Драгининг истеъфога чиқишига ҳукмрон коалиция таркибига кирувчи «Беш юлдуз ҳаракати» партиясининг бош вазир жамоаси томонидан тақдим этилган «Инфляция туфайли аҳолига ёрдам кўрсатиш тўғрисида»ги қонун лойиҳаси бўйича овоз беришда иштирок этишдан бош тортгани сабаб бўлди. Партия таклиф этилаётган айрим чора-тадбирларга қарши.
Маттарелла Драгининг истеъфосини биринчи сўровда қабул қилмаган эди. Президент бош вазирга парламент билан маслаҳатлашишни тавсия қилган. 20 июль куни Италия парламенти Драгига ишонч вотуми тўғрисидаги резолюцияни қабул қилди. Аммо бу ҳукуматни бўлинишдан қутқара олмади: учта асосий коалиция партияси — «Беш юлдуз ҳаракати», «Олға Италия» ва «Лига» овоз беришда қатнашишдан бош тортди. Шундан сўнг Драги иккинчи марта истеъфога чиқишини эълон қилди ва бу сафар президент унинг сўровини қабул қилди.
Изоҳ (0)