Буюк Британияга Россиядан кўмир импортини тақиқлаш 2022 йилнинг 10 августидан бошлаб, нефть импортига тақиқ эса 31 декабрдан бошлаб кучга киради. Бу ҳақда Британия ҳукумати сайтида жойлаштирилган ҳужжатга таяниб, Meduza хабар қилди.
Британия апрель ойида 2022 йил охиригача Россиядан кўмир ва нефть импортини тақиқлаши ҳақида эълон қилганди. Бироқ ўшанда аниқ саналар айтилмаган.
Июнь ойининг охирида Буюк Британия Россиядан олтин импортини чеклашга ҳам қўшилди. Бу келишув 21 июлдан кучга кирди, дейилади Британия ҳукумати сайтида.
Европа Иттифоқи апрель ойи бошида Россия кўмирини импорт қилишни тўлиқ тақиқлаш бўйича келишиб олган — май ойининг охирида эса Россия нефтидан қисман воз кечган. Кўмирга чекловлар 10 августдан, нефтга эса йил охиридан кучга киради.
Бир ҳафта олдин Германия 1 августдан бошлаб Россия кўмиридан, 31 декабрдан эса Россия нефтидан бутунлай воз кечишини маълум қилган эди.
Мавзуга доир: АҚШ Россиядан олтин импортини тақиқлади.