Наманган вилояти Чуст тумани ҳокимлиги мансабдор шахслари томонидан ноқонуний ҳужжатлар асосида маданий мерос объектини сотиш ва қайта қуришга рухсат берилгани ва оқибатда тарихий ёдгорликка жиддий зарар етказилгани аниқланди. Бу ҳақда Маданий мерос агентлиги хабар берди.
Ушбу ҳолат Вазирлар Маҳкамасининг маданий меросни ҳимоя қилиш инспекцияси, Маданий мерос агентлиги ва Бош прокуратура томонидан мутасадди идоралар билан биргаликда ўтказилган текширув натижаларига кўра аниқланган.
Жумладан, Чуст туманининг «Янгиҳаёт» маҳалласида жойлашган, маданий мерос ёдгорлиги ҳисобланган, ХХ аср бошига мансуб «Абдумалик» масжиди 2018 йилда туман ҳокимининг қарорига кўра «ҳашар йўли билан қурилган, ҳозирда қаровсиз қолган, эгаси аниқланмаган бино» деган сабаб билан Маданий мерос инспекцияси балансидан ҳокимият балансига ўтказилган.
Сўнгра туман ҳокимлигининг ташаббуси билан ушбу масжид биноси аукцион савдолари орқали фуқаро Т.А.га 61 миллион сўмга сотиб юборилган. Туман ҳокими қарори билан ушбу маданий мерос объектини қайта қуришга ноқонуний равишда рухсат берилган. Оқибатда фуқаро Т.А. томонидан «Абдумалик масжиди»нинг 61,1 квадрат метр шифт қисми қайтадан таъмирланиб, туси ўзгартирилгани сабабли унга 806,5 миллион сўм миқдорида жиддий зарар етказилган.
Текшириш натижасига кўра, Чуст тумани ҳокимлиги мансабдор шахслари ва бошқаларга нисбатан жиноят иши қўзғатилиб, тергов ҳаракатлари олиб борилмоқда.
Изоҳ (0)