2022 йил январь—июнь ойларида банклар орқали нақд пул айланмаси 316,3 трлн сўмни ташкил этиб, 2021 йилнинг мос даврига нисбатан 36,4 фоизга ошди. Бу ҳақда Марказий банк хабар берди.
Жумладан, банк кассаларига нақд пул тушумлари 152,3 трлн сўмни, чиқим қилинган нақд пуллар 164 трлн сўмни ташкил этди.
Жорий йилнинг январь—июнь ойларида банк кассаларига жами нақд пул тушумлари ўтган йилнинг шу даврига нисбатан 32 фоизга ошди.
Савдо ва хизматлар соҳасидан тушумлар 25 фоизга (14,3 трлн сўм) ва банк хизматларидан нақд пул тушумлари 53,4 фоизга (17,6 трлн сўм) ошди.
Натижада жами тушумлар таркибида савдо ва хизматлар соҳасидан тушумлар улуши 2,6 фоизли бандга камайди.
2022 йилнинг 6 ойида савдо ва хизматлар соҳасидан жами тушумлар 114,7 трлн сўмни ташкил қилиб, шундан, 62,5 фоизи (71,7 трлн сўм) нақд шаклда, 37,5 фоизи (43 трлн сўм) терминаллар орқали банк ҳисобрақамларига кирим қилинди.
Ўтган йилнинг шу даврида мос равишда 64 фоизи (57,4 трлн сўм) нақд шаклда, 36 фоизи (32,2 трлн сўм) терминаллар орқали банк ҳисобрақамларига кирим қилинган эди.
Аввалроқ Ўзбекистонда нақд пулга бўлган талаб нега ошаётгани ҳақида хабар берилганди.
Изоҳ (0)