Hindiston o‘rta radiusda parvozni amalga oshiradigan Agni-IV ballistik raketasini muvaffaqiyatli sinovdan o‘tkazdi. Bu haqda mamlakat mudofaa vazirligiga asoslanib “Interfaks” xabar bergan.

Raketa mahalliy vaqt bilan 19:30 da (Toshkent vaqti bilan 18:30da) Bengla bo‘g‘ozidagi Abdul Kalom orolidan uchirilgan.

“Raketaning muvaffaqiyatli sinov parvozi Strategik kuchlar qo‘mondonligining rejadagi parvozlari doirasida amalga oshirildi”, – deyiladi Hindiston mudofaa vazirligining xabarida.

Shuningdek, vazirlik raketaning sinovi Hindistonda minimal tiyib turish potensialini rivojlantirishga xizmat qilishini qayd etdi.

Hindiston 750 kilometr masofadagi nishonni ura oladigan Agni-I, 2 ming kilometr masofaga uchib bora oladigan Agni-II, 3,5 – 4,5 ming kilometrga yetib borib nishonni uradigan Agni-III hamda Agni-IV, shuningdek 5 ming kilometrga yetib bora oladigan Agni-V ballistik raketalariga ega. Ularning hammasi yadro jangovar zaryadi bilan parvoz qilishi mumkin.