Дунёдаги энг йирик сувости кемаси «Дмитрий Донской» Россия флотидан чиқарилгани хабар қилинди. «ТАСС» манбалари эса кема йил охиригача хизматда қолишини айтмоқда

Дунёдаги энг йирик атом сувости кемаси «Дмитрий Донской» Россия денгиз флоти таркибидан чиқарилди. У утилизация қилинади, дея хабар бермоқда «РИА Новости» ҳарбий-саноат мажмуасидаги манбага таяниб.

Агентлик суҳбатдошининг айтишича, «Дмитрий Донской» номи 2021 йилдан бери қурилаётган «Борей-А» синфидаги бошқа бир стратегик ядро сувости кемасига бериб бўлинган. Унинг ишга туширилиши 2025 йилга мўлжалланган.

Аммо «ТАСС» «Россия шимолидаги кемасозлик саноати ва ҳуқуқ-тартибот идоралари»даги манбаларига таяниб, «Дмитрий Донской» сувости кемаси денгизда жанговар тайёргарлик вазифаларини бажараётгани ва унинг кейинги тақдири бўйича қарор 2022 йил охирида қабул қилиниши ҳақида хабар берди.

«Дмитрий Донскойънинг Россия денгиз флотидан олиб чиқилиши ҳақидаги сўнгги хабарлар ҳақиқатга тўғри келмайди. У камида йил охиригача жанговар таркибда қолади», — деди «ТАСС» суҳбатдошларидан бири.

ТК-208 «Дмитрий Донской» оғир ядровий сувости крейсери 1981 йилда СССР флотининг жанговар таркибига кирган. Сувости кемаси 941 «Акуал» лойиҳасининг (НАТО таснифи бўйича — SSBN Typhoon) етакчи сувости кемаси ҳисобланади, лойиҳа доирасида жами олтита қайиқ қурилган. Бу ҳажми (48 минг тонна) бўйича дунёдаги энг катта сувости кемасидир.

2002 йилда сувости кемаси «Булава» қитъалараро баллистик ракетасини синовдан ўтказиш учун модернизация қилинди. «Булава-М» ракетаси синовларида иштирок этиши учун «Дмитрий Донской» камида 2020 йилгача фойдаланишдан чиқарилмаслиги хабар қилинган эди.