Ўзбекистон халқ артисти, Туркманистонда хизмат кўрсатган артист, маданият вазири Озодбек Назарбеков «Chotki TV» YouTube-каналига берган интервьюсида онаси билан боғлиқ хотиралари, болаликдаги орзулари, биринчи муҳаббати ва марҳум санъаткор Муҳриддин Ҳолиқов билан қандай танишгани ҳақида гапирди.
Озодбек Назарбеков онаси билан боғлиқ хотиралари, болаликдаги орзулари ҳақида
«Кўпчилик болалигини ширин хотиралар билан эслайди, мен болалигимни ўксик хотиралар билан эслайман. 10 ёш бўлганимда онам дунёдан ўтган. Оилада кенжа фарзанд бўлганман, ҳаттоки ўн ёшимда ҳам онамнинг ортидан қолмаганман. Қаерга бўлса ҳам, аёллар бирга ўтирсалар ҳам, доим ёнида юрганман. Билмадим, нимага унақа бўлганман, онамдан бир дақиқа ҳам узоқлашишни истамас эдим. 10 ёшимгача онамсиз ухламаганман. Опаларим айтиб беришади, бир куни онам мени опамникига ташлаб кетганида мен йиғлаб жанжал қилган эканман, кейин ярим кечаси онамнинг олдига олиб борган экан. Онамнинг дунёдан ўтиши мен учун жуда катта зарба ва ўта оғир синов бўлган.
Онамнинг бир гаплари ҳеч ҳам эсимдан чиқмайди, болалик хотираларини эслайман, бизнинг пайтимизда вилоят ҳокими ‘обком’ дейиларди. Ойим ҳам мени эркалаб ‘обком болам’ дерди. Ниятлари холис экан, вақт ўтса ҳам, шу гапларини эслайман. Вазир бўлган куним ҳам кабинетда ўтириб шу нарсани эсладим. Қаерга борсам ҳам, онамнинг суратини ёнимда олиб юраман. Шу расм мен телевидениеда ишлаб юрган пайтим ўша ерда турган эди, кейин у ердан нарсаларимни йиғиштириб кабинетга олиб бордим. Расмни кабинетга қўйдим ва бирдан ‘обком болам’ деганлари эсимга келди. Шундан кейин ўтириб йиғладим ва мана, сиз ўйлагандек фарзанд бўлдим, деб бирпас расмлари билан гаплашдим. Онамнинг орзуси дуо бўлган экан, бўлмаса бизнинг оиламизда вазият оғир бўлгани учун акаларим, опаларим ўрта махсус таълимда қолиб кетишди, олий маълумотли бўлишолмади. Вазирликка ишга келганимнинг биринчи куни онам билан 10 дақиқа гаплашдим. Шунча дуо қилиб, шу кунларни кўрмадингиз дедим. Шу кунлар болалигимда бўлгани учун менда фақат ўксик хотиралар қолган. Билмадим, лекин қувончли воқеаларни эслолмайман, балки унгача қувончли воқеалар бўлгандир, бироқ бу қайғули кунлар барчасини ювиб ташлади. Онамнинг тириклигида қувонч, кайфият бор эди», — дейди Озодбек Назарбеков.
Болаликдаги орзулари ва биринчи муҳаббати ҳақида
«Мен ҳам бола бўлганман, табиийки, биринчи муҳаббат бўлган. Ўша пайтлари мактабда ўқирдим, муносабатлар узоққа бормаган. Уни бошқага турмушга бериб юборишган. Шу билан тугаган, бўлди.
Тўғрисини айтсам, болалигимда жуда кўп орзу қилганман. Ўша пайти учувчи, актёр, хонанда бўлишни орзу қилганман. Лекин шуларнинг ичида барибир мусиқага бўлган эътиборим кучли бўлган», — дейди маданият вазири.
Муҳриддин Холиқов билан қандай танишгани ҳақида
«Муҳриддин Холиқовга ҳавасим жуда юқори бўлган. Ҳаттоки уларнинг овозига тақлид ҳам қилар эдим. Ўша пайтда Ботир Зокиров хотирасига бағишланган танлов эълон қилинган. Танловнинг биринчи турида қатнашиб ғолиб бўлганман, шунда февраль ойлари эди. Кейинги тур яна икки ойдан кейин бошланарди. Бизга кетаверинглар, кейинги турга келасизлар дейишган. Шу вақтда мен Муҳриддин Холиқовни топиб, танишиб кетмасам бўлмайди деганман.
Бир ҳафтада уйларини топганман ва борганман. Шундан кейин 3-4 кун у ерга қатнаганман. Бир куни биз келиб кетаётган вақтда Муҳриддин Холиқовнинг акаси Шаҳобиддин ака келиб қолди. Кейин кўришдик, мен билан Маъруф ака деган шаҳрихонлик, консерваторияда ўқийдиган ғижжакчи бор эди. Шу киши мени олиб юрган эди. У киши Собир Мўминов биринчи чиққан вақтда улар билан бирга ишларди. Ўша киши Муҳриддин акани танир эди, тўйларда улар билан кўришган экан. Мени Муҳриддин аканинг уйларига олиб борди ва Шаҳобиддин акамга тушунтирди. Кейин улар уч кундан кейин соат 6 га келсангизлар, биз ҳаммамиз шу ердан йиғилиб тўйга кетамиз, шунда кўришасизлар деди.
Мен эса Шаҳоб акага Муҳриддин Холиқовнинг қўшиқларини айтиб ёзиб олган кассетани бердим ва кетдим. Кейин Маъруф ака билан Шаҳоб ака айтган куни келдик. Узоқдан келсак менинг қўшиғим эшитилди, баланд қилинган эди. Машинани уйнинг тагига қўйиб, эшикларини, багажларини очиб мусиқани эшитишаётган экан, ҳамма мусиқачилар атрофни эгаллаб олганди. Борганимдан кейин ғалати бўлиб кетдим, чунки уларнинг ҳаммаси мен телевизорда кўрган одамлар эди. Кўришдим, раҳматли Ҳусниддин акам ҳам ўша ерда эди. Мусиқани қайта-қайта эшитишди, Муҳриддин акам уйда экан, узун плашларни кийиб тушиб келди.
Ҳали бу мусиқаларни эшитмаган экан, қайта қўйиб эшитиб кўрди. Бир соатча қолиб кетдик, кейин Муҳриддин ака билан танишдим. У киши мен билан Тошкентга келасанми, бирга юрасанми деб сўради. Кутилмаган савол бўлди, етти ухлаб тушимга кирмаганди, ҳа дедим. Унда уйингга бор, 30 март куни келсанг, 15 кун воҳа тарафга чиқиб кетамиз деди. Уйга бориб ҳамма билан хайрлашиб келдим. Шу билан келиб, шу ерда қолиб кетдим», — дейди хонанда.
Маданият вазири тўйга хизматга борадими?
«Тўйларга боришни роса соғинаман, лекин нима қилай? Менга ҳеч ким тақиқ қўймаган. Қайсидир маънода, бораман, деб ваъда бериб қўйиб, бора олмай қолган пайтларим бўлди. Шундан кейин тўхтатиб турмасам бўлмас экан, деган қарорга келдим», — дейди Озодбек Назарбеков.
Мавзуга доир:
Изоҳ (0)