O‘zbekiston xalq artisti, Turkmanistonda xizmat ko‘rsatgan artist, madaniyat vaziri Ozodbek Nazarbekov “Chotki TV” YouTube-kanaliga bergan intervyusida onasi bilan bog‘liq xotiralari, bolalikdagi orzulari, birinchi muhabbati va marhum san’atkor Muhriddin Holiqov bilan qanday tanishgani haqida gapirdi.
Ozodbek Nazarbekov onasi bilan bog‘liq xotiralari, bolalikdagi orzulari haqida
“Ko‘pchilik bolaligini shirin xotiralar bilan eslaydi, men bolaligimni o‘ksik xotiralar bilan eslayman. 10 yosh bo‘lganimda onam dunyodan o‘tgan. Oilada kenja farzand bo‘lganman, hattoki o‘n yoshimda ham onamning ortidan qolmaganman. Qayerga bo‘lsa ham, ayollar birga o‘tirsalar ham, doim yonida yurganman. Bilmadim, nimaga unaqa bo‘lganman, onamdan bir daqiqa ham uzoqlashishni istamas edim. 10 yoshimgacha onamsiz uxlamaganman. Opalarim aytib berishadi, bir kuni onam meni opamnikiga tashlab ketganida men yig‘lab janjal qilgan ekanman, keyin yarim kechasi onamning oldiga olib borgan ekan. Onamning dunyodan o‘tishi men uchun juda katta zarba va o‘ta og‘ir sinov bo‘lgan.
Onamning bir gaplari hech ham esimdan chiqmaydi, bolalik xotiralarini eslayman, bizning paytimizda viloyat hokimi ‘obkom’ deyilardi. Oyim ham meni erkalab ‘obkom bolam’ derdi. Niyatlari xolis ekan, vaqt o‘tsa ham, shu gaplarini eslayman. Vazir bo‘lgan kunim ham kabinetda o‘tirib shu narsani esladim. Qayerga borsam ham, onamning suratini yonimda olib yuraman. Shu rasm men televideniyeda ishlab yurgan paytim o‘sha yerda turgan edi, keyin u yerdan narsalarimni yig‘ishtirib kabinetga olib bordim. Rasmni kabinetga qo‘ydim va birdan ‘obkom bolam’ deganlari esimga keldi. Shundan keyin o‘tirib yig‘ladim va mana, siz o‘ylagandek farzand bo‘ldim, deb birpas rasmlari bilan gaplashdim. Onamning orzusi duo bo‘lgan ekan, bo‘lmasa bizning oilamizda vaziyat og‘ir bo‘lgani uchun akalarim, opalarim o‘rta maxsus ta’limda qolib ketishdi, oliy ma’lumotli bo‘lisholmadi. Vazirlikka ishga kelganimning birinchi kuni onam bilan 10 daqiqa gaplashdim. Shuncha duo qilib, shu kunlarni ko‘rmadingiz dedim. Shu kunlar bolaligimda bo‘lgani uchun menda faqat o‘ksik xotiralar qolgan. Bilmadim, lekin quvonchli voqealarni eslolmayman, balki ungacha quvonchli voqealar bo‘lgandir, biroq bu qayg‘uli kunlar barchasini yuvib tashladi. Onamning tirikligida quvonch, kayfiyat bor edi”, — deydi Ozodbek Nazarbekov.
Bolalikdagi orzulari va birinchi muhabbati haqida
“Men ham bola bo‘lganman, tabiiyki, birinchi muhabbat bo‘lgan. O‘sha paytlari maktabda o‘qirdim, munosabatlar uzoqqa bormagan. Uni boshqaga turmushga berib yuborishgan. Shu bilan tugagan, bo‘ldi.
To‘g‘risini aytsam, bolaligimda juda ko‘p orzu qilganman. O‘sha payti uchuvchi, aktyor, xonanda bo‘lishni orzu qilganman. Lekin shularning ichida baribir musiqaga bo‘lgan e’tiborim kuchli bo‘lgan”, — deydi madaniyat vaziri.
Muhriddin Xoliqov bilan qanday tanishgani haqida
“Muhriddin Xoliqovga havasim juda yuqori bo‘lgan. Hattoki ularning ovoziga taqlid ham qilar edim. O‘sha paytda Botir Zokirov xotirasiga bag‘ishlangan tanlov e’lon qilingan. Tanlovning birinchi turida qatnashib g‘olib bo‘lganman, shunda fevral oylari edi. Keyingi tur yana ikki oydan keyin boshlanardi. Bizga ketaveringlar, keyingi turga kelasizlar deyishgan. Shu vaqtda men Muhriddin Xoliqovni topib, tanishib ketmasam bo‘lmaydi deganman.
Bir haftada uylarini topganman va borganman. Shundan keyin 3-4 kun u yerga qatnaganman. Bir kuni biz kelib ketayotgan vaqtda Muhriddin Xoliqovning akasi Shahobiddin aka kelib qoldi. Keyin ko‘rishdik, men bilan Ma’ruf aka degan shahrixonlik, konservatoriyada o‘qiydigan g‘ijjakchi bor edi. Shu kishi meni olib yurgan edi. U kishi Sobir Mo‘minov birinchi chiqqan vaqtda ular bilan birga ishlardi. O‘sha kishi Muhriddin akani tanir edi, to‘ylarda ular bilan ko‘rishgan ekan. Meni Muhriddin akaning uylariga olib bordi va Shahobiddin akamga tushuntirdi. Keyin ular uch kundan keyin soat 6 ga kelsangizlar, biz hammamiz shu yerdan yig‘ilib to‘yga ketamiz, shunda ko‘rishasizlar dedi.
Men esa Shahob akaga Muhriddin Xoliqovning qo‘shiqlarini aytib yozib olgan kassetani berdim va ketdim. Keyin Ma’ruf aka bilan Shahob aka aytgan kuni keldik. Uzoqdan kelsak mening qo‘shig‘im eshitildi, baland qilingan edi. Mashinani uyning tagiga qo‘yib, eshiklarini, bagajlarini ochib musiqani eshitishayotgan ekan, hamma musiqachilar atrofni egallab olgandi. Borganimdan keyin g‘alati bo‘lib ketdim, chunki ularning hammasi men televizorda ko‘rgan odamlar edi. Ko‘rishdim, rahmatli Husniddin akam ham o‘sha yerda edi. Musiqani qayta-qayta eshitishdi, Muhriddin akam uyda ekan, uzun plashlarni kiyib tushib keldi.
Hali bu musiqalarni eshitmagan ekan, qayta qo‘yib eshitib ko‘rdi. Bir soatcha qolib ketdik, keyin Muhriddin aka bilan tanishdim. U kishi men bilan Toshkentga kelasanmi, birga yurasanmi deb so‘radi. Kutilmagan savol bo‘ldi, yetti uxlab tushimga kirmagandi, ha dedim. Unda uyingga bor, 30-mart kuni kelsang, 15 kun voha tarafga chiqib ketamiz dedi. Uyga borib hamma bilan xayrlashib keldim. Shu bilan kelib, shu yerda qolib ketdim”, — deydi xonanda.
Madaniyat vaziri to‘yga xizmatga boradimi?
“To‘ylarga borishni rosa sog‘inaman, lekin nima qilay? Menga hech kim taqiq qo‘ymagan. Qaysidir ma’noda, boraman, deb va’da berib qo‘yib, bora olmay qolgan paytlarim bo‘ldi. Shundan keyin to‘xtatib turmasam bo‘lmas ekan, degan qarorga keldim”, — deydi Ozodbek Nazarbekov.
Mavzuga doir:
Izoh (0)