Ўзбекистон ҳудудида, шу жумладан, Тошкент шаҳрида кузатилаётган аномал иссиқ об-ҳаво сабабли метрополитен поездлари фаолиятига ўзгартириш киритилади. Бу ҳақда «Тошкент метрополитени» хабар қилди.

Қайд этилишича, Тошкент шаҳрида ҳаво ҳароратининг кескин кўтарилиши сабаб ерусти темир йўллари ва уларнинг пўлат қисмларининг ҳарорати жуда юқори бўлиб, +70 даражага етиши мумкин. Темир йўллардан фойдаланиш қоидаларига кўра, рельсларнинг ҳарорати +55 даражадан ошганда, поездлар ҳаракати тезлиги пасайтирилиши керак. Яъни, қоидаларда рельсларнинг ҳарорати +60 даража бўлганда, поездлар ҳаракати тезлиги 40 км/соатдан, +65 даражада 25 км/соатдан ошмаслиги, +70 даражада эса поездлар ҳаракати тақиқланиши белгиланган.

«Юқоридагиларни эътиборга олиб, поездлар ҳаракати ва йўловчиларнинг хавфсизлигини таъминлаш мақсадида метрополитеннинг Ер усти ҳалқа йўли ва Сергели йўли участкаларида ҳаво ҳароратининг кўтарилиши кузатилган вақтларда поездлар ҳаракати тезлигининг вақтинча чеклови жорий этилади», — дейилади хабарда.

Аввалроқ Ўзбекистонда аномал иссиқ об-ҳаво сабаб поездлар жадвалига ўзгартириш киритилиши ҳақида хабар қилинганди. Эслатиб ўтамиз, иссиқ об-ҳаво таъсирида юз бераётган бу амалиёт биринчи мартаси эмас. Июнь ойида ҳам икки марта поездлар тезлиги камайтирилиб, қатнов жадвалига ўзгартириш киритилган.