Қашқадарё вилояти Китоб туманида 18 июль шифохонада қўшнилар ўртасида оммавий муштлашув бўлгани ва икки киши пичоқлангани ҳақида хабар қилинганди. Вилоят Соғлиқни сақлаш бошқармаси жанжал оқибатлари ҳақида маълумот берилди.
Қайд этилишича, шу куни соат 12:48 да Китоб тумани «Самарқанд» МФЙ ҳудудида яшовчи фуқаро Т.О. (2004 йилда туғилган) турли жароҳатлар билан туман тиббиёт бирлашмаси қабул-диагностика бўлимига олиб келинган. Бемор зудлик билан мутахассислар томонидан тегишли текширувлардан ўтказилиб, унга биринчи ёрдам кўрсатилган ва шошилинч тез тиббий ёрдам бўлимига ётқизилган. Шу бемор билан бирга тиббиёт бирлашмасининг травматология бўлимига «Самарқанд» МФЙ ҳудудида яшовчи Қ.Р. (1955 йилда туғилган) ҳам жароҳат олгани сабабли ётқизилган.
Ушбу воқеалардан бироз вақт ўтиб, туман тиббиёт бирлашмаси ҳовлисида бемор Т.О. дан хабар олишга келган қариндошлари ҳамда беморга жароҳат етказганликда гумонланаётган кишилар ўртасида жанжал юзага келган. Жанжал оқибатида яна бир гуруҳ фуқаролар жароҳатланган. Жумладан, «Самарқанд» МФЙ ҳудудида яшовчи Қ.И. (1979 йилда туғилган) ва шу маҳаллада яшовчи А.А. (1978 йилда туғилган) санчиб кесилган турли жароҳатлар билан шифохонага ётқизилган.
Фуқаролар ўртасидаги жанжал шу ерда ҳозир бўлган ички ишлар ходимлари томонидан тўхтатилган. Жароҳатланган фуқароларга зудлик билан тегишли тиббий ёрдамлар кўрсатилган. Айни пайтда юқорида қайд этилган 4 нафар беморнинг аҳволи қониқарли, даволаш жараёнлари давом эттирилмоқда.
Ҳодиса оқибатида туман тиббиёт бирлашмасида даволанаётган бошқа беморлар, бу ерда фаолият кўрсатаётган тиббиёт ходимлари ва воқеага гувоҳ бўлган бошқа фуқароларга шикаст етмаган.
Ҳолат бўйича ҳуқуқни муҳофаза қилиш идоралари томонидан тергов ҳаракатлари олиб борилмоқда.
Изоҳ (0)