XVII асрга оид меъморий дурдона сифатида эътироф этилган Эрон масжиди таъмирлаш ишлари давомида шикастланган. Бу ҳақда расмийларга таяниб, BBC хабар бермоқда.
Исфаҳондаги Шоҳ масжиди Эрондаги энг гўзал масжид ҳисобланади ва Бирлашган Миллатлар Ташкилотининг Жаҳон мероси рўйхатига киритилган.
Аммо сўнгги суратларда унинг ўзига хос гул нақшлари бир томони нотекис кўринади ҳамда бир-бирига мос келмайди.
Расмийлар камчиликларни тан олди ва уларни бартараф этиш мумкинлигини айтди. «Иш ҳали тугалланмаган», — деди таъмирлаш ишлари вакили Меҳди Пакдел.
Пакдел ушбу ҳолатни искала ва гумбазнинг 54 метр баландлигига боғлиқ муаммолар билан изоҳлади.
Ушбу масжид Эрондаги учинчи йирик шаҳар Исфаҳоннинг олтин даврида қурилган. У ёрқин кўк ва сариқ нақшли кошинлари билан ҳам Эрондаги ҳам хориждаги мусулмонлар ва сайёҳларни ўзига жалб қилади.
«Назоратчилар ва таъмирловчилар гумбазнинг айниқса, юқори қисми зарарланганини пайқади», — деди шаҳар мероси раҳбари Алиризо Изадий давлат матбуотига.
«Биз гумбаз устига ёпиладиган сополларни алмаштирмоқчимиз, чунки искала оғирлиги уларнинг четига зарар етказган», — дея қўшимча қилди расмий.
Мавзуга доир: Эронда Мирзо Улуғбек ва Алишер Навоий битиклари аниқланди
Изоҳ (0)