Украина президент Владимир Зеленскийнинг веб-сайтида эълон қилинган фармонларга кўра, мамлакатнинг беш вилоятида Украина хавфсизлик хизмати (УХХ) бошқармаси бошлиқлари алмаштирилди.
Гап Харьков, Суми, Полтава, Карпаторти ва Днепрбўйи вилоятлари ҳақида кетмоқда. Ушбу вилоятларда УХХнинг ҳудудий раҳбарлари этиб, мос равишда Александр Куц, Эдуард Федоров, Иван Рудницкий, Евгений Борзилов ва Сергей Лисак тайинланди.
Қайд этилишича, улардан баъзилари аввал Украинанинг бошқа вилоятларида ҳам худди шу лавозимларни эгаллаб келган. Лисак Житомир вилоятида, Рудницкий Карпаторти вилоятида, Борзилов Полтава вилоятида ишлаган.
Президент, шунингдек, Днепрбўйи ва Суми вилоятларидаги УХХ бошқармаси бошлиқлари — Владимир Крестянский ва Руслан Григоренкони ишдан бўшатиш тўғрисидаги фармонларни имзолади. Владимир Горбенко бошқарма раиси ўринбосари лавозимидан ҳам четлаштирилди.
Аввалроқ Владимир Зеленский Украина Хавфсизлик хизмати раҳбари Иван Бакановни ўз лавозимидан четлатган эди. У ўз қарорини УХХ раҳбари ва Россия махсус хизматлари ўртасидаги алоқалар билан изоҳлади. 19 июль куни Олий Рада Бакановни ишдан олиш учун овоз берди.
УХХ раҳбари вазифасини бажарувчи этиб Василий Малюк тайинланди.
Президент УХХда кадрлар текшируви ўтказилаётганини эълон қилган. Унга кўра, 28 нафар мансабдор шахсни ишдан бўшатиш масаласи ҳал қилинмоқда. «Турли йўналишларда турли даражадаги ходимлар. Лекин сабаблар бир хил – ишнинг қониқарсиз натижалари», — дея тушунтирди Зеленский.
Изоҳ (0)