Францияда ўт ўчирувчилари мамлакат жануби-ғарбидаги Жиронда департаментида давом этаётган кучли ўрмон ёнғинларига қарши курашмоқда. Бу ҳақда «Интерфакс» француз ОАВларига таяниб, хабар берди.
Ёнғин аллақачон 19,3 минг гектар ўрмонни йўқ қилган. Айни пайтда оловни бартараф этишга 2 минг нафар ўт ўчирувчи жалб этилган.
Кучли ёнғин ва шамол туфайли Бордо шаҳри деярли бутунлай тутун билан қопланган. Маҳаллий аҳоли ижтимоий тармоқларда кўчалардаги кучли туман ҳамда шаҳарнинг кул ранг осмони фотосуратларини жойлаштирмоқда, шунингдек, куйинди ҳидидан шикоят қилмоқда.
Францияда аномал иссиқ об-ҳаво шароити фонида табиий ёнғинлар авж олди. Сешанба (19 июль) куни маҳаллий метеорология хизматлари мамлакат ғарбидаги 10 дан ортиқ департаментларда хавфнинг ўта юқори – «қизил» даражасини эълон қилди. 70 га яқин департаментларда эса хавфнинг ўрта юқори – «тўқ сариқ» даражаси қайд этилган.
19 июль куни баъзи ҳудудларда ҳаво ҳарорати Цельсий бўйича 40 даражадан ошиши кутилмоқда.
Мавзуга доир: Европада кенг кўламли ўрмон ёнғинлари юз бермоқда, ўт ўчирувчилар етишмаяпти (фото)
Изоҳ (0)