Бутун Европа бўйлаб тарқалаётган жазирама тўлқини сабабли Буюк Британияда фавқулодда ҳолат эълон қилинди. Бу ҳақда Reuters хабар берди.
Буюк Британия соғлиқни сақлаш хавфсизлиги агентлиги (UKSHA) хавфнинг 4-даражасини эълон қилди — бу «жазирама туфайли миллий фавқулодда ҳолат» деб таърифланган.
Расмийлар аҳоли саломатлиги билан боғлиқ хавфлар туфайли тиббиёт ходимларини тайёрлаб, тез ёрдам машиналарини ҳозирлаб қўйган. Рекорд даражадаги юқори ҳарорат ҳаракатланиш, соғлиқни сақлаш муассасалари ва мактабларнинг фаолиятини ҳам бузиши кутилмоқда. Бундан ташқари, мамлакатнинг айрим ҳудудлари электр, сув ва уяли алоқа хизматларидан узилиши хавфи юқори.
Буюк Британия Метеорология бюросининг огоҳланиришича, юқори ҳарорат ҳатто соғлом одамлар орасида ҳам жиддий касаллик ва ўлимга сабаб бўлувчи хавфларни келтириб чиқариши мумкин.
Лондон метро тармоғи қисқартирилган жадвал асосида ишламоқда, йўловчилар фақат ўта зарур ҳолларда ундан фойдаланишга чақирилди. Лондон яқинидаги Лутон аэропортида юқори ҳарорат туфайли учиш-қўниш йўлаги юзасида нуқсон пайдо бўлган, оқибатда рейсларнинг учиши ва қўниши вақтинча тўхтатилган.
Қайд этилишича, Британия Ҳарбий-ҳаво кучларининг Брайз-Нортон ҳарбий базаси ҳам аномал иссиқлик ва учиш-қўниш йўлаги юзасининг юмшаб қолиши билан боғлиқ муаммолар туфайли ишламаяпти.
Аввалроқ Британияда мамлакат тарихидаги энг иссиқ кун кутилаётгани хабар қилинганди. Ҳаво ҳарорати биринчи марта 40 даражадан ошиб кетиши прогноз қилинмоқда.
Изоҳ (0)