Ижтимоий тармоқларда Қорақалпоғистонда 1—2 июль кунлари бўлиб ўтган ноқонуний намойишларда қатнашган айрим фуқаролар бедарак йўқолгани ҳақида хабарлар тарқалди. Бош прокуратура матбуот хизмати АОКАда ўтказилган брифингда ҳолатга аниқлик киритди.
Қайд этилишича, баъзи хорижий ижтимоий тармоқларда воқеада иштирок этган айрим фуқаролар бедарак йўқолгани ҳақида мутлақо асоссиз ва ҳақиқатга тўғри келмайдиган фейк хабарлар тарқатилмоқда.
«Ваҳоланки, тармоқларда тарқатилган рўйхатда кўрсатилган бир қисм фуқаролар ўз яшаш уйида экани, бир қисми Қорақалпоғистон ҳудудидан четга чиқиб кетгани, айримлари эса умуман мавжуд бўлмаган шахслар экани аниқланди», — дейилади хабарда.
Шунга қарамай, ҳолат Бош прокуратура тезкор-тергов гуруҳи томонидан назоратга олинган ва ҳозирги вақтда яна бир бор ўрганиб чиқилмоқда.
«Барчангиздан сохта ва уйдирма маълумотларга ишонмасдан, ўтказилаётган тергов ва тезкор-қидирув тадбирлари ҳақидаги ҳаққоний маълумотларни Бош прокуратура штаби ахборот манбаларидан олишингизни сўраб қоламиз», — дейди бош прокурор матбуот котиби Ҳаёт Шамсутдинов.
Изоҳ (0)