Ўзбекистонда 2022 йил якунигача яна 20 минг гектар экин майдони аҳолига бўлиб берилади

Шавкат Мирзиёев 18 июль кунги видеоселектор йиғилишида деҳқончилик қилаётган аҳоли таклифлари асосида улар кўтарган муаммолар ечимларини айтиб ўтди. Бу ҳақда президент матбуот котиби хабар қилди.

Жумладан:

• йил якунигача яна қўшимча 20 минг гектар экин майдони аҳолига бўлиб берилади (жами 100 минг гектар бўлади);
• келгуси йилда яна қўшимча 100 минг гектар экин майдони ҳам аҳолига тарқатилади (жами 200 минг гектар бўлади).

«Бу – жуда катта ислоҳот. Бунинг ҳисобига қўшимча 1 миллион 200 минг нафар аҳолини банд қилиш учун шароит яратилмоқда.

Энг асосийси – агар туман ҳокими, ҳоким ёрдамчиси бу масалага ҳисоб-китоб билан ёндашса, озиқ-овқат, ишсизлар масаласини бемалол ҳал қила олади», — деган давлат раҳбари.

Мутасаддилар, вилоят ва туман ҳокимларига бир ой муддатда:

• камида 1 мингта маҳаллада кичик ҳажмли музлаткичлар ўрнатиш;
• 3 минг гектарда парник усулида эртаки маҳсулотлар етиштириш дастурини бошлаш топширилган.

Бунга жорий йилда 50 миллион доллар, келгуси йилда яна 100 миллион доллар йўналтирилади.

Шунингдек, «дафтарлар»даги аҳолига ер берилганда, барча имтиёз ва тўловлар 1 йилгача сақланиб қолади. Танловда 1 нафар талабгор иштирок этганда ҳам танлов ўтказилган ҳисобланади. Маҳаллаларга ҳосилдор уруғ, кўчат етказиш ва маҳсулотини сотиб олиш учун 150 миллиард сўм йўналтирилади.