«Рома» ва «Наполи» Пауло Дибала учун курашмоқда

«Ювентус»нинг собиқ ҳужумчиси Пауло Дибалада фаолиятини давом эттириш учун иккита вариант бор.

Журналист Жанлуки ди Марционинг ёзишича, аргентиналик футболчига фақат «Наполи» ва «Рома» клублари даъвогарлик қилмоқда. Айни дамда бошқа клублар томонидан қизиқишлар йўқ.

Тез орада Дибаланинг фаолиятини қаерда давом эттириши борасида бир қарорга келиши кутилмоқда.

Римликлар Дибала учун ким ошди савдосида қатнашмоқчи эмас, шунинг учун клуб унга талабидан пастроқ таклифни берган. Дибала йилига 6—7 миллион евро олишни хоҳламоқда, «Рома» эса унга 4,5 миллион ва бонуслар таклиф қилган.

«Наполи»нинг таклифи футболчининг талабларига тўғри келади. Тез орада Пауло бу икки клубдан бирини танлайди.

Аввалроқ Паулога «Интер» ҳам қизиқиш билдираётганди. Аммо «нераззурилар» билан музокаралар деярли бир ойдан буён ўтказилмаяпти.

Маълумот учун, 2015 йилдан буён «Ювентус» шарафини ҳимоя қилиб келган Пауло 2021/22 йилги мавсумда 15 та гол ва 6 та голли узатмага муаллифлик қилди. Мавсум сўнгида туринликлар билан шартномаси якунига етган Дибала эркин агентга айланди.