Ўзбекистонда «Электр энергетика секторини трансформация қилиш ва барқарор электр узатиш» инвестиция лойиҳаси амалга оширилади. Бу ҳақда бугун, 15 июль куни Тошкент шаҳрида бўлиб ўтган анжуманда маълум қилинди, дея хабар бермоқда «Дарё» мухбири.
«Миллий электр тармоқлари» АЖ бошқаруви раиси ўринбосари Феруз Қурбоновнинг айтишича, лойиҳа доирасида электр энергетика тизимини рақамлаштириш ҳам мақсад қилинган.
«Лойиҳа доирасида 2024 йилгача электр энергетика тармоғига CKADA тизимини жорий этиш кўзда тутилган. Бу тизим республикада ишлаб чиқарилган ҳамда етказиб берилаётган электр энергиясини онлайн равишда мониторинг қилиш, тармоқларда келиб чиққан камчиликларни аниқлаш имконини беради. Шу орқали қайси жойда авариявий узилишлар содир бўлса ёки электр дефицити аниқланса, муаммони тезкорлик билан бартараф этиш мумкин бўлади. Яъни CKADA тизими – электр энергия узилишларини камайтиради, электрни барқарор етказиб берилишини таъминлайди», - деди корхона вакили.
Энергектика вазири ўринбосари Шерзод Хўжаевнинг таъкидлашича, ушбу лойиҳа узоқ вақт кутилган. «Лойиҳа доирасига республиканинг 11 та ҳудудида 22 та эскирган юқори кучланишли подстанцияларни реконструкция ва модернизация қилиш ҳамда кенгайтириш, Тошкент вилоятида янги 500 кВли подстанция ва электр узатиш тармоқларини қуриш киради. Шу билан бирга, энг аҳамиятли жиҳатларидан бири бўлмиш CKADA, EMS тизимларини жорий этилиши албатта, биз учун узоқ кутилган лойиҳалардир. Ўйлайманки, бу лойиҳани амалга оширишда «Миллий электр тармоқлари» мутахассислари Жаҳон банки кўмагида яхши муваффақиятларга эришади», – деди вазирлик расмийси.
Энергетика вазирлиги маълумотларига кўра, Ўзбекистонда электр энергиясига бўлган талаб 2018 йилдаги 61 млрд киловатт соатдан 2030 йилга бориб 110 млрд киловатт соатгача ошиши кутилмоқда. Ҳозирда мамлакатда 270 минг километрдан ортиқ электр узатиш ва тақсимлаш тармоқлари мавжуд. Уларнинг аксарияти Совет иттифоқи даврида қурилган бўлиб, ишлаш муддати аллақачон тугаган. Эскирган инфратузилма электр энергиясида катта йўқотишларга олиб келмоқда.
«Мазкур лойиҳа ҳукуматга электр энергетика соҳасининг самарали ишлаши ва ривожланишига тўсқинлик қилаётган муаммоларни ҳал қилишга ёрдам беради. Бу чора-тадбирлар қарийб 32 миллион истеъмолчини ишончли электр энергияси билан таъминлаш ва қайта тикланувчи энергия ишлаб чиқариш бўйича янги йирик лойиҳаларни электр тармоқларига улаш имконини беради», — деди Жаҳон банкининг Ўзбекистондаги ваколатхонаси раҳбари Марко Мантованелли.
Маълум қилинишича, лойиҳанинг умумий қиймати 427 миллион долларни ташкил этади. Хусусан, Ҳалқаро тараққиёт уюшмаси Ўзбекистонга 380 млн доллар (шундан 330 млн доллар имтиёзли кредит), Яшил иқлим фонди 47 млн доллар (шундан 43 млн доллари имтиёзли кредит ва 4 млн доллар грант маблағлари) кредит ажратади.
Изоҳ (0)