Олий Мажлиси Сенати раиси Танзила Норбоева 15 июль куни давлат ташрифи билан Ўзбекистонда бўлиб турган Туркманистон президенти Сердар Бердимуҳамедов билан учрашди. Бу ҳақда Сенат ахборот хизмати хабар қилди.
Қайд этилишича, суҳбат чоғида парламентлараро мулоқот мамлакатлар ўртасидаги ҳар томонлама ҳамкорлик ва стратегик шерикликни мустаҳкамлашнинг муҳим қисмига айлангани таъкидланган. Ўзбекистон Олий Мажлиси ва Туркманистон Миллий Кенгаши ҳузурида ташкил этилган парламентлараро дўстлик гуруҳларининг фаолияти алоҳида қайд этилган.
Жорий йил май ойида Ашхобод шаҳрида ўтказилган Марказий Осиё мамлакатлари ва Россиянинг биринчи парламентлараро форуми ва Аёллар мулоқоти доирасидаги биринчи йиғилиш якунлари юқори баҳоланган. Барқарор ривожланиш соҳасидаги миллий мақсад ва вазифаларни имплементация қилиш борасида тажриба алмашиш, маданий-гуманитар алоқаларни кенгайтириш, томонларни қизиқтирган барча йўналишлар бўйича қўшма тадбирлар ташкил этишга келишиб олинган.
Учрашув якунида томонлар икки давлат манфаатлари йўлида парламентлараро алоқаларни мустаҳкамлашга тайёр эканини таъкидлаган.
Изоҳ (0)