O‘zbekistonda “Elektr energetika sektorini transformatsiya qilish va barqaror elektr uzatish” investitsiya loyihasi amalga oshiriladi. Bu haqda bugun, 15-iyul kuni Toshkent shahrida bo‘lib o‘tgan anjumanda ma’lum qilindi, deya xabar bermoqda “Daryo” muxbiri.
“Milliy elektr tarmoqlari” AJ boshqaruvi raisi o‘rinbosari Feruz Qurbonovning aytishicha, loyiha doirasida elektr energetika tizimini raqamlashtirish ham maqsad qilingan.
“Loyiha doirasida 2024-yilgacha elektr energetika tarmog‘iga CKADA tizimini joriy etish ko‘zda tutilgan. Bu tizim respublikada ishlab chiqarilgan hamda yetkazib berilayotgan elektr energiyasini onlayn ravishda monitoring qilish, tarmoqlarda kelib chiqqan kamchiliklarni aniqlash imkonini beradi. Shu orqali qaysi joyda avariyaviy uzilishlar sodir bo‘lsa yoki elektr defitsiti aniqlansa, muammoni tezkorlik bilan bartaraf etish mumkin bo‘ladi. Ya’ni CKADA tizimi – elektr energiya uzilishlarini kamaytiradi, elektrni barqaror yetkazib berilishini ta’minlaydi”, - dedi korxona vakili.
Energektika vaziri o‘rinbosari Sherzod Xo‘jayevning ta’kidlashicha, ushbu loyiha uzoq vaqt kutilgan. “Loyiha doirasiga respublikaning 11 ta hududida 22 ta eskirgan yuqori kuchlanishli podstansiyalarni rekonstruksiya va modernizatsiya qilish hamda kengaytirish, Toshkent viloyatida yangi 500 kVli podstansiya va elektr uzatish tarmoqlarini qurish kiradi. Shu bilan birga, eng ahamiyatli jihatlaridan biri bo‘lmish CKADA, EMS tizimlarini joriy etilishi albatta, biz uchun uzoq kutilgan loyihalardir. O‘ylaymanki, bu loyihani amalga oshirishda “Milliy elektr tarmoqlari” mutaxassislari Jahon banki ko‘magida yaxshi muvaffaqiyatlarga erishadi”, – dedi vazirlik rasmiysi.
Energetika vazirligi ma’lumotlariga ko‘ra, O‘zbekistonda elektr energiyasiga bo‘lgan talab 2018-yildagi 61 mlrd kilovatt soatdan 2030-yilga borib 110 mlrd kilovatt soatgacha oshishi kutilmoqda. Hozirda mamlakatda 270 ming kilometrdan ortiq elektr uzatish va taqsimlash tarmoqlari mavjud. Ularning aksariyati Sovet ittifoqi davrida qurilgan bo‘lib, ishlash muddati allaqachon tugagan. Eskirgan infratuzilma elektr energiyasida katta yo‘qotishlarga olib kelmoqda.
“Mazkur loyiha hukumatga elektr energetika sohasining samarali ishlashi va rivojlanishiga to‘sqinlik qilayotgan muammolarni hal qilishga yordam beradi. Bu chora-tadbirlar qariyb 32 million iste’molchini ishonchli elektr energiyasi bilan ta’minlash va qayta tiklanuvchi energiya ishlab chiqarish bo‘yicha yangi yirik loyihalarni elektr tarmoqlariga ulash imkonini beradi”, — dedi Jahon bankining O‘zbekistondagi vakolatxonasi rahbari Marko Mantovanelli.
Ma’lum qilinishicha, loyihaning umumiy qiymati 427 million dollarni tashkil etadi. Xususan, Halqaro taraqqiyot uyushmasi O‘zbekistonga 380 mln dollar (shundan 330 mln dollar imtiyozli kredit), Yashil iqlim fondi 47 mln dollar (shundan 43 mln dollari imtiyozli kredit va 4 mln dollar grant mablag‘lari) kredit ajratadi.
Izoh (0)