Зеленский офиси Украина Қуролли Кучларининг қарши ҳужумга ўтиш шартини маълум қилди

Украина қўшинлари жанговар зирҳли техника ва ҳаво мудофааси тизимларида устунликка эришгандан кейингина қарши ҳужумни бошлаши мумкин, деди Украина президенти офиси раҳбарининг маслаҳатчиси Алексей Арестович ‘‘Feygin Live’’ YouTube каналида.

Арестовичнинг сўзларига кўра, Украинада юқорида айтилган ҳарбий техника ва қурол-яроғлар етишмаса қўшинлар қарши ҳужумга ўта олмайди, бироқ уларни Киевга етказиб бериш масаласи яқин орада муҳокама қилинади.

‘‘Россия армияси ҳали ҳам биздан икки жиҳатдан устун: булар зирҳли транспорт воситаларидаги пиёдалар сони ва уларни қўллаб-қувватловчи артиллерия’’, — деди у.

Украина ҳарбийлари рус артиллериясига қаршилик кўрсатишни ўрганди, улар етарлича зирҳли техникага эга бўлгач, «ҳалқа ёпилади» ҳамда қўшинлар қарши ҳужумга тайёр бўлади, дейди Арестович.

11 июль куни Украина президенти Владимир Зеленский ҳарбийларга ҳозир Россия армияси назорати остида бўлган жанубий қирғоқбўйи ҳудудларни жанг билан қайтариб олишни буюрган эди. Қайд этилишича, бунинг учун Украина қуролли кучлари Ғарб қурол-яроғлари билан таъминланган «миллионлаб жанговар кучлар»ни тўпламоқда.

Шу билан бирга, ҳужум «қандай вақт оралиқларида» ўтказилиши айтилмаган.

Мавзуга доир:

• Зеленский Украинага АҚШ томонидан берилаётган ёрдам етарли эмас деб ҳисоблайди
• АҚШ Украинага қурол етказиб беришда давом этади