Қозоғистон президенти Қосим-Жўмарт Тўқаевнинг матбуот котиби Руслан Желдибай маълум қилишича, Россия Қозоғистоннинг стратегик шериги ва иттифоқдоши бўлиб келган ва шундай бўлиб қолади. Бу ҳақда “Коммерсант” хабар берди.
Матбуот котибининг баёноти давлат раҳбари томонидан Қозоғистоннинг транзит салоҳиятини ривожлантириш бўйича ўтказилган йиғилиш юзасидан изоҳ доирасида янгради. Президент вакили таъкидлашича, Қозоғистон Россия манфаатларига зарар етказадиган хатти-ҳаракатларга йўл қўймайди.
“Унинг (Россиянинг) манфаатларига зарар етказадиган ҳеч қандай ҳаракатларга йўл қўйилмайди. Қозоғистонга нисбатан ҳам шундай ҳаракатлар амалга оширилмайди, деб умид қиламиз”, — деб ёзди Желдибай Facebookъда. Унинг таъкидлашича, Россия Қозоғистоннинг стратегик шериги ва иттифоқдоши бўлиб келган ва шундай бўлиб қолади. Шу тариқа Руслан Желдибай журналистларнинг Қозоғистон президенти томонидан транспорт-транзит салоҳиятини ошириш бўйича йиғилиш борасидаги саволларига жавоб берди.
“Гап биринчи навбатда Қозоғистон углеводородларини геосиёсий беқарорлик шароитида халқаро бозорларга етказиб бериш йўналишларини диверсификациялаш ҳақида бормоқда. Йиғилишда прагматизм руҳида янги транспорт йўлакларини қуриш муҳокама қилинди”, — дея аниқлик киритди президент матбуот котиби. Желдибайнинг айтишича, гап узоқ муддатли режалар ҳақида бормоқда, қабул қилинган қарорлар эса сиёсий мотивларга эга эмас.
Аввалроқ россиялик экспортчиларнинг Қозоғистонда нефть тортиб чиқаришни тўхтатиб қўйиши хавфи фонида Тўқаев “Казмунайгаз”га юкларни денгиз орқали ташишни ривожлантиришни топширган эди. Етказиб беришларни Россияни айланиб ўтган ҳолда амалга ошириш кўзда тутилмоқда. Давлат раҳабри фикрича, ҳукумат Қозоғистон портларини трансформация қилиши ва уларни “Каспий денгизининг етакчи хабларидан бири”га айлантириши керак. Бунгача Қозоғистон Молия вазирлиги де-факто Россияга санкциялар туфайли товарларнинг алоҳида турларини етказиб беришни чеклайдиган фармон лойиҳасини муҳокама учун эълон қилган эди.
Тўқаевнинг баёноти Россия суди Каспий қувур консорсиумининг денгиз терминали ишини 30 кунга тўхтатиш ҳақидаги қароридан бир кун ўтиб янгради. Бу 2022 йилда учинчи марта Қозоғистон нефтининг Россия орқали жаҳон бозорига чиқарилишини тўхтатиб қўйиши мумкин.
Аввалроқ Қосим-Жўмарт Тўқаев Европа Иттифоқига Россия нефтини Қозоғистон нефтига алмаштиришни таклиф қилган эди. Президент, шунингдек, Европа Иттифоқини муқобил трансконтинентал йўлакларни, жумладан, Транскаспий халқаро транспорт йўналишини ривожлантиришда ҳамкорлик қилишга чақирган. У Қозоғистон жаҳон ва Европа бозорларидаги вазиятни барқарорлаштириш учун ўзининг углеводород салоҳиятидан фойдаланишга тайёрлигини маълум қилган.
Мавзуга доир: Тўқаев Путиннинг ёнида ДХР ва ЛХРни квази-давлат ҳудудлари деб атади
Изоҳ (0)