Индонезиянинг Бали оролида бўлиб ўтган йиғилишда G20 мамлакатлари ташқи ишлар вазирлари анъанавий гуруҳ бўлиб суратга тушишдан бош тортди. Бу ҳақда Япониянинг Kyodo агентлиги хабар берди.
Хабарга кўра, АҚШ Давлат котиби Энтони Блинкен ва бошқа Ғарб дипломатлари Россия ташқи ишлар вазири Сергей Лавров билан биргаликда суратга тушишдан қочган. Россия томони бу ҳақда изоҳ бермади.
Аввалроқ Индонезия ташқи ишлар вазири Ретно Марсуди 7 июль куни G7 давлатлари вакиллари Лавровнинг иштироки боис тантанали зиёфатида қатнашишдан бош тортганини айтган эди. Россия Ташқи ишлар вазирлиги матбуот котиби Мария Захарованинг айтишича, Лавров «бойкотчиларнинг йўқлигини пайқамаган».
Reuters агентлигининг таъкидлашича, Сергей Лавров Балига ташрифи чоғида Индонезия ташқи ишлар вазири билан суратга тушган, шу пайт залда «Урушни қачон тўхтатасизлар?!» ва «Нега урушни тўхтатмаяпсизлар?!» деган ҳайқириқлар янграган.
7 июль куни Балида G20 ташқи ишлар вазирларининг юзма-юз кенгаши очилди, асосий муҳокамалар 8 июлга белгиланган. Сергей Лавров дастлабки учрашувлардан бирида Саудия Арабистони ва Мексика ташқи ишлар вазирлари ўртасида ўтирган.
Изоҳ (0)