Олий ва ўрта махсус таълим вазирлигида 4 июнь куни Япониянинг Ўзбекистондаги элчиси Ёшинори Фужияма, Япония халқаро ҳамкорлик агентлиги (JICA)нинг Ўзбекистондаги ваколатхонаси раҳбари Сугуру Миязаки бошчилигидаги делегацияси билан учрашув бўлиб ўтди. Бу ҳақда вазирлик ахборот хизмати хабар қилди.
Қайд этилишича, мулоқотда дастлаб, мамлакат таълим тизимида амалга оширилаётган ислоҳотлар, кунчиқар давлат билан ҳамкорлик алоқаларининг бугунги ҳолати ва истиқболлари муҳокама қилинган.
Япония ҳукумати томонидан 20 йилдан ортиқ вақт мобайнида молиялаштирилаётган мазкур лойиҳа доирасида Япониянинг таниқли университетларида 378 нафар фуқаро таҳсил олиш имконига эга бўлган. Уларнинг 343 нафари Ўзбекистонга магистрлик даражаси билан қайтиб, бугун халқ хўжалигининг турли тармоқларида фаолият олиб бормоқда. Бугунги кунда яна 35 киши Японияда ўқишини давом эттиряпти.
Муҳокамаларда, шунингдек, кадрлар тайёрлаш соҳасида ҳамкорлик тўғрисида, хусусан, қўшма лойиҳа доирасида Ўзбекистон фуқароларининг Япония университетларида магистратура ва докторантурада таҳсил олиши ҳақида сўз борган.
Томонлар ўртасида ҳамкорлик келишувлари имзоланган. Дастлаб Ўзбекистон ҳукумати номидан олий ва ўрта махсус таълим вазири Абдуқодир Тошқулов ва Япония элчиси Ёшинори Фужияма ўртасида 2,76 миллион доллар қийматидаги кадрлар тайёрлаш учун стипендиялар лойиҳалари доирасида Алмашинув нотаси ҳамда ушбу лойиҳани бажариш бўйича Япония халқаро ҳамкорлик агентлиги (JICA) билан грант гитими имзоланган.
Ушбу лойиҳалар доирасида келаси йилда 18 та давлат хизматчисига Японияда магистратура ва докторантурада ўқиш имкони яратилади.
Изоҳ (0)