AQSH Xitoyning 5 ta kompaniyasini Rossiya armiyasini qo‘llab-quvvatlaganlikda aybladi

AQSh prezidenti Jo Bayden ma’muriyati Xitoyning beshta kompaniyasini Rossiya armiyasiga harbiy yordam berganlikda ayblab qora ro‘yxatga kiritdi. Bu haqda Reuters xabar berdi.

Qora ro‘yxatga olish jarayonini nazorat qiluvchi AQSH Savdo vazirligi, Xitoyning Connec Electronic, King Pai Technology, Sinno Electronics, Winninc Electronic va World Jetta (HK) Logistics kompaniyalari qora ro‘yxatdagi va sanksiyalar ostidagi Rossiya subyektlariga tovarlar yetkazib berish bo‘yicha shartnomalar tuzishda davom etayotganini ma’lum qildi.

Shuningdek, qora ro‘yxatga O‘zbekiston, Rossiya, BAA, Litva, Pokiston, Singapur, Buyuk Britaniya va Vyetnam kabi davlatlardan yana 31 ta kompaniya kiritildi, deyiladi Federal reyestrdagi bayonotda. Jami 36 kompaniyadan 25 tasi Xitoyda savdo operatsiyalariga ega edi.

“Bu harakatlar butun dunyo bo‘ylab biznes va jismoniy shaxslarga, agar ular Rossiyani qo‘llab-quvvatlashga harakat qilsa, AQSH ham ulardan voz kechishi haqida kuchli signal beradi”, — dedi Savdo vazirining sanoat va xavfsizlik bo‘yicha o‘rinbosari Alan Esteves.

Xitoy Tashqi ishlar vazirligi matbuot kotibi Chjao Litszyan ushbu Xitoy firmalari Rossiya armiyasiga mahsulot yetkazib berganmi, degan savolga na tasdiq, na inkor javobini berdi, biroq Xitoy AQSHning Rossiyaga qarshi sanksiyalariga qarshi ekanini yana bir bor ta’kidladi.

“Xitoy va Rossiya o‘zaro hurmat va manfaatlarga asoslangan normal savdo hamkorligini amalga oshirmoqda. Bunga hech qanday uchinchi tomon aralashmasligi yoki cheklov qo‘ymasligi kerak”, — dedi u Pekindagi matbuot anjumanida.

Xitoylik firmalarning qora ro‘yxatga kiritilgani ularning amerikalik ta’minotchilari o‘z mahsulotlarini Xitoy kompaniyalariga sotishdan oldin Savdo vazirligi litsenziyasini olishi kerakligini anglatadi.