Данияда Копенгагендаги Field’с савдо марказида отишма юз бериши оқибатида бир нечта одам турли даражадаги жароҳатлар олди. Бу ҳақда Дания полицияси Twitter’да хабар берган, деб ёзмоқда «РБК».
«Ўқ овози эшитилган, бир неча киши яраланган. Воқеа жойида суриштирув олиб бораяпмиз», — дейилади полиция баёнотида.
Кучишлатар тизим вакиллари савдо марказидаги одамларга полиция вакиллари келишини кутишни, бошқа фуқароларга эса ҳодиса юз берган мазкур ҳудудга келмасликни тавсия қилган.
Шунингдек, полиция отишмадан кейин бир киши ҳибсга олингани ҳақида ҳам маълумот берган.
Копенгаген мери Софи Андерсен Twitter’да шаҳарда инқирозга тайёргарлик тартиби эълон қилинишини билдирган. У отишма рўй бергани ҳақидаги хабарлар «даҳшатли» эканлиги, бироқ ҳалок бўлганлар ёки ярадорлар ҳақидаги аниқ маълумотлар ихтиёрида йўқлигини таъкидлаган.
Field’с савдо марказида бўлган ва ҳодиса туфайли яраланган аёл ТВ2 телеканалига интервью берган, у юқори қаватдаги Сунсет Boulevard ресторанида бўлган вақтида камида уч марта ўқ овозини эшитгани, одамларнинг савдо марказидан қоча бошлаганини кўрганини айтган.
Телеканал ҳодиса жойидан фотосуратлар ва видеоларни ҳам эълон қилган. Суратлардан бирида яраланган эркак ҳам кўринган: фотода тез ёрдам гуруҳининг уни савдо марказидан ташқарига олиб чиқиб, тиббий кўмак бераётгани акс этган.
ТВ2 телеканали Field’с савдо марказидаги ҳодисани видеога олган одамнинг 14 сониялик материалини ҳам ошкор қилган, унда отишма юз берган ҳолатни қисман томоша қилиш мумкин. Кадрларда савдо маркази биноси кўринади, ўқ овозига ўхшаш шовқин бор, шунингдек бақириб қочаётган одамлар овози эшитилади.
Field’с савдо маркази Копенгаген марказидан жанубда, Каструп аэропортига яқин ерда жойлашган. ТВ2 каналининг қайд этишича, савдо маркази биноси англиялик ижрочи Гарри Стайлзнинг 3 июлдаги концерти бўлиб ўтган Royal Аренаъга яқин жойда.
Изоҳ (0)