Daniyada Kopengagendagi Field’s savdo markazida otishma yuz berishi oqibatida bir nechta odam turli darajadagi jarohatlar oldi. Bu haqda Daniya politsiyasi Twitter’da xabar bergan, deb yozmoqda “RBK”.
“O‘q ovozi eshitilgan, bir necha kishi yaralangan. Voqea joyida surishtiruv olib borayapmiz”, — deyiladi politsiya bayonotida.
Kuchishlatar tizim vakillari savdo markazidagi odamlarga politsiya vakillari kelishini kutishni, boshqa fuqarolarga esa hodisa yuz bergan mazkur hududga kelmaslikni tavsiya qilgan.
Shuningdek, politsiya otishmadan keyin bir kishi hibsga olingani haqida ham ma’lumot bergan.
Kopengagen meri Sofi Andersen Twitter’da shaharda inqirozga tayyorgarlik tartibi e’lon qilinishini bildirgan. U otishma ro‘y bergani haqidagi xabarlar “dahshatli” ekanligi, biroq halok bo‘lganlar yoki yaradorlar haqidagi aniq ma’lumotlar ixtiyorida yo‘qligini ta’kidlagan.
Field’s savdo markazida bo‘lgan va hodisa tufayli yaralangan ayol TV2 telekanaliga intervyu bergan, u yuqori qavatdagi Sunset Boulevard restoranida bo‘lgan vaqtida kamida uch marta o‘q ovozini eshitgani, odamlarning savdo markazidan qocha boshlaganini ko‘rganini aytgan.
Telekanal hodisa joyidan fotosuratlar va videolarni ham e’lon qilgan. Suratlardan birida yaralangan erkak ham ko‘ringan: fotoda tez yordam guruhining uni savdo markazidan tashqariga olib chiqib, tibbiy ko‘mak berayotgani aks etgan.
TV2 telekanali Field’s savdo markazidagi hodisani videoga olgan odamning 14 soniyalik materialini ham oshkor qilgan, unda otishma yuz bergan holatni qisman tomosha qilish mumkin. Kadrlarda savdo markazi binosi ko‘rinadi, o‘q ovoziga o‘xshash shovqin bor, shuningdek baqirib qochayotgan odamlar ovozi eshitiladi.
Field’s savdo markazi Kopengagen markazidan janubda, Kastrup aeroportiga yaqin yerda joylashgan. TV2 kanalining qayd etishicha, savdo markazi binosi angliyalik ijrochi Garri Staylzning 3-iyuldagi konserti bo‘lib o‘tgan Royal Arena’ga yaqin joyda.
Izoh (0)