Ўзбекистонда уйсиз итларни реабилитация қилиш бўйича биринчи «Меҳр» маркази Халқаро байрам муносабати билан Central Park (собиқ Телман)да итларни яхши қўлларга топшириш фестивалини ўтказди. Бу ҳақда «Дарё» мухбири хабар берди.
Унда ҳар ким бир-биридан мулойим итларни эркалаб, уларга меҳр улашиши, ҳамфикрлари билан мулоқот қилиши, мароқли вақт ўтказиши мукин эди. Бундан ташқари меҳмонлар меҳр-оқибат дарслари, итлар билан ёга, рақс флеш-моби, хайрия ярмаркаси, фудкортлар, дижейлар, мусиқачилар ижодидан баҳраманд бўлишди. Ташкилотчиларнинг сўзларига кўра, фестиваль ўтказиш ғояси бундан 2 йил аввал туғилган. Тадбирнинг асосий ғоялари сифатида итларга муносиб оилалар топиш, уларга нисбатан меҳр-шафқат туйғуларини тарғиб қилиш, ушбу жониворлар инсонга энг яқин дўст эканлигини намойиш этишдан иборат.
Фестивальнинг асосий ташкилотчилари сифатида Food for Life жамоаси вакиллари эътироф этилди. Ушбу жамоа бошпанасизлар ҳамда меҳрибонлик уйи тарбияланувчиларига ҳам ғамхўрлик қилиб келмоқда. Айнан уларнинг ташаббуси билан тадбирда фудкорт, рақс флеш-моби, мавзули аквагримлар ҳудудлари ташкил этилди.
Шунингдек, Artha арт-жамоаси, «Меҳр ва оқибат» ҳайвонларни ҳимоя қилиш жамияти вакиллари ҳам йиғилганларга ит ва мушукларга бағрикенг бўлиш, уларга меҳр улашиш бўйича зарурий тушунчаларни ўз ичига олган чиқишлар билан иштирок этди. Фестивальда меҳмонлар Dalahast, Dj Sam, DJ Aracool, YoungNoize ҳамда DJ Piligrim каби ижодкорларнинг қўшиқ ва мусиқий чиқишларини томоша қилиш имконига эга бўлди.
Тадбир якунларига кўра 4 мушук боласи ва 3 та ит ўзларига оила топди. Келгусида уларнинг ҳаёти «Меҳр» маркази томонидан алоҳида назорат қилиб борилади. Фетивалда Central Park, Artha, Food for Life, Agromir, «Меҳр ва оқибат», «Vet+ZooPlaneta» жамоалари ҳамкор сифатида ўз ёрдамларини берганлари қайд этилди.
Изоҳ (0)