Ўзбекистон аҳолисида сўнгги 5-6 йил ичида саёҳатга чиқиш маданияти шакллана бошлаган. Бу ҳақда АОКАда бўлиб ўтган матбуот анжуманида Туризм ва маданий мерос вазири ўринбосари Ботиржон Шаҳриёров маълум қилди, дея хабар бермоқда «Дарё» мухбири.
Ботиржон Шаҳриёровнинг айтишича, мамлакат аҳолисининг 20 миллион нафардан ортиғида саёҳатга чиқиш қобилияти мавжуд.
«2021 йилда 6 миллион нафар маҳаллий сайёҳ ички туризм йўналишида саёҳатни амалга оширган. Лекин 6 миллион киши ичидан қанчаси, неча марта саёҳатга чиққанини олсак, албатта, рақамларимиз жуда ҳам кам бўлади. Чунки бир фуқаро йил давомида бир неча бор саёҳатга чиққан бўлса ҳам, ушбу рақам ичида ўтирибди. Бунда умумий ҳисоб 3-4 баробарга камаяди. Ҳозир республикада саёҳатга чиқиш қобилияти мавжуд 21 миллион нафар аҳоли бор.
Бизда ички туризмни кенгайтириш бўйича имкониялар кенг бўлса-да, ҳали уни тўлиқ бажаришда етарли даражага чиқдик, деб айта олмаймиз. Бунинг учун жуда кўп ишлашимиз керак. Аҳоли орасида олиб борилган ўрганишлар шуни кўрсатадики, одамларда ҳақиқатан ҳам охирги 5-6 йил ичида, энди-энди саёҳатга чиқиш маданияти шаклланяпти. Уларни саёҳатга олиб чиқиш учун биз етарли даражада хизмат кўрсатадиган туристик компанияларни, туризм инфратузилмасини ёки аҳолида саёҳатга чиқиш учун давромад манбайига эга бўлиш имкониятларни етарли даражада ярата олганимиз йўқ», – деди вазир ўринбосари.
Ботиржон Шаҳриёровнинг таъкидлашича, келгуси 5 йилда аҳолини ички туризмга жалб қилиш даражасини 3-4 баробарга ошириш режалаштирилган.
Маълумот учун, 2021 йил давомида Ўзбекистонга ташриф буюрган хорижий сайёҳлар сони 1 миллион 881 минг 345 нафарга етиб, туристик хизматлар экспорти 422 миллион 100 минг АҚШ долларини ташкил этган. Ўтган йилда туризм соҳасидаги барча инвестиция лойиҳалари доирасида умумий қиймати 6 триллион 900 миллиард сўм бўлган маблағлар ўзлаштирилган.
Изоҳ (0)