Қорақалпоғистоннинг Нукус шаҳрида ноқонуний намойишларда қатнашганликда гумонланган фуқаролар қўлга олинган. Бу ҳақда АОКАда Қорақалпоғистондаги фавқулодда ҳолат вақтида амалга оширилган ишлар юзасидан ўтказилган брифингда маълум қилинди.
Миллий гвардия ахборот хизмати раҳбари Даврон Жуманазаровнинг маълум қилишича, 1—2 июль кунлари тартибсизликларда қатнашгани учун воқеа жойларида ушланган 516 нафар фуқаро ички ишлар бошқармасига топширилган. Улар билан суриштирув ишлари олиб борилмоқда. Суриштирувлар натижасида айрим фуқаролар маъмурий чоралар қўлланилганидан сўнг қўйиб юборилган.
Фавқулодда ҳолат эълон қилинганидан сўнг 4 июлга ўтар кечаси комендантлик тартибини бузгани учун 110 нафар фуқаро кўчаларда бемақсад юргани учун ушланиб, ички ишлар идораларига топширилган. 12 та автотранспорт воситаси жарима майдончасига жойлаштирилди. Хусусан, Нукус шаҳрида комендантлик режимига риоя қилмаган 58 нафар шахс ушланган. Шундан 28 нафарига тегишли моддалар билан маъмурий баённома расмийлаштирилган, қолганлари билан профилактика суҳбат ўтказилиб, 7:00 дан кейин қўйиб юборилган.
Изоҳ (0)