Samsung’нинг янги смартфонини 10 сонияда «қувватлантириш» мумкин. Интернетда Galaxy XCover 6 Pro’нинг тасвирлари тарқалди

Samsung компанияси 13 июль куни янги ҳимояланган Galaxy XCover 6 Pro смартфонини тақдим этишини эълон қилди. Ҳозирда интернетда мазкур моделнинг тасвири тарқалиб кетди, деб хабар беради IXBT.

Маълум қилинишича, Galaxy XCover 6 Pro ечиладиган орқа панелга эга бўлиб, унинг остидан алмаштириш мумкин бўлган 4050 мА/соат сиғимли аккумулятор ўрин олади. Ушбу конструкция фойдаланувчиларга батареяни алмаштириш орқали мобил телефоннинг автоном ишлашини осонлик билан узайтириш имконини беради.

Манбаларга кўра, «ўлмайдиган» янги Samsung’ни 10 сония ичида «қувватлантириш» мумкин бўлади.

Galaxy XCover 6 Pro модели 6,56 дюймли AMOLED-экранга эга бўлган, 13 мегапикселли фронтал камераси олд қирқимга жойлаштирилган. Смартфон бир кристалли Qualcomm Snapdragon 778G процессори, 6 гигабайт тезкор ва 128 гигабайт ички хотира ёрдамида ишлайди.

Автофокусга эга асосий камераси 50 мегапикселлни ташкил этади, унга қўшимча равишда 8 мегапикселли кенг бурчакли камера ўрнатилган. Шунингдек, смартфон USB-C ва 3,5 миллиметрли разъёмлар, Wi-Fi 6E, Bluetooth 5.2 ва NFC’га эга бўлади.

Аввалроқ Xiaomi компанияси Poco F4 ва Poco X4 GT смартфонларини тақдим этгани, Ноодатий Vivo телефони Гиннеснинг рекордлар китобига киритилгани тўғрисида хабар берилганди.