52audio портали AirPods Pro 2 наушниклари ва унинг кейси рендерлари билан бўлишди. Аввалроқ портал томонидан эълон қилинган AirPords 2 тасвирлари охир-оқибат тасдиқланган эди.
Маълумотларга кўра, наушниклар H1 процессори учун System-in-Package (SiP) тизимига эга бўлади. У фаол шовқин сўндириш учун жавоб беради. SiP технологияси самарадорликни оширади ва энергия тежашга хизмат қилади.
AirPods Pro 2 мусиқани Apple Lossless (ALAC) форматига ўзгартиришсиз ўқий олади. Янги гаджетнинг соғлиқни назорат қилиш, масалан, юрак уриши, тана ҳароратини ўлчаш функциялари бўлади.
Барча iPhone эгалари iOS 16 билан олдинлари фақат Apple Watch эгалари учун мўлжалланган «Фитнес» мобил дастурига эга бўлади. Мазкур бренд смартфонлари учун шагомер мавжуд. Агарда янги AirPods Pro’да ростдан ҳам юрак урушини кузатувчи датчик пайдо бўлса, «ақлли» соатларнинг фойдаси камаяди.
Наушник ташқи кўриниши ўзгармаган, кейси эса янгича кўриниш олган. Биринчи авлоддан фарқли ўлароқ, AirPods Pro 2 кейси динамик учун тешикка эга бўлади: у «Локатор» функциясининг ишлаши учун зарур. Шу орқали наушникни овози орқали топиш мумкин бўлади.
Шунингдек, Apple кейсда иккита тешик учун жой қолдирган. Фойдаланувчи наушникни кўтариб юриш учун унга ип карабин ўтказиши мумкин. Янгиланган кейсга Lightning ўрнига USB-C порти ўрнатилади. Гаджет кузда iPhone 14 билан бирга тақдим этилиши кутилмоқда.